ჩეხეთის პრეზიდენტმა პეტრ პაველმა განაცხადა, რომ ნატო-ს ქვეყნებმა რუსული საბრძოლო თვითმფრინავების მიერ მათი საჰაერო სივრცის დარღვევაზე რეაგირება უნდა მოახდინონ.
„რუსეთი ძალიან სწრაფად მიხვდება, რომ შეცდომა დაუშვა და ზღვარს გადავიდა. სამწუხაროდ, ეს კონფლიქტის ზღვარზე დაბალანსების საკითხია, მაგრამ ბოროტების წინაშე უკან დახევა უბრალოდ შეუძლებელია. რუსეთი ისე მოიქცევა, როგორც ჩვენ დავუშვებთ“, - განაცხადა პაველმა ჩეხურ ტელევიზიასთან ინტერვიუში.
პეტრ პაველი ნატო-ს სამხედრო კომიტეტის ყოფილი ხელმძღვანელი იყო. მისი კომენტარები სექტემბრის განმავლობაში მომხდარი ინციდენტების სერიას მოჰყვა, რომლის დროსაც რუსულმა დრონებმა და გამანადგურებლებმა აღმოსავლეთ ევროპის ნატო-ს წევრი ქვეყნების - პოლონეთის, რუმინეთისა და ესტონეთის საზღვრები დაარღვიეს.
ბოლო ინციდენტი პარასკევს მოხდა, როდესაც ესტონეთის მთავრობის ცნობით, რუსული გამანადგურებლები ქვეყნის საჰაერო სივრცეში შეიჭრნენ და იქ 12 წუთის განმავლობაში დაფრინავდნენ.
