პოლონეთის პრემიერ-მინისტრმა დონალდ ტუსკმა განაცხადა, რომ მან ნატო-ს გენერალურ მდივანს აცნობა „ობიექტების“ მიერ პოლონეთის საჰაერო სივრცის დარღვევისა და მათ წინააღმდეგ მიღებული ზომების შესახებ, თუმცა კვლავ არ ახსენა, რომ ეს „ობიექტები“ რუსული იყო.
„მე ნატო-ს გენერალურ მდივანს ვაცნობე არსებული სიტუაციისა და იმ ქმედებების შესახებ, რომლებიც ჩვენ განვახორციელეთ ჩვენი საჰაერო სივრცის დამრღვევი ობიექტების წინააღმდეგ. ჩვენ მუდმივ კონტაქტზე ვართ,“ - წერს ტუსკი Х-ზე.
10 სექტემბერს, ღამით, უკრაინის საჰაერო ძალებმა რუსული დრონების მიერ პოლონეთის საჰაერო სივრცის შესაძლო დარღვევის შესახებ განაცხადეს.
პოლონეთის შეიარაღებული ძალების ოპერატიულმა სარდლობამ ოფიციალურად დაადასტურა ქვეყნის საჰაერო სივრცის დარღვევა და მოსახლეობას, სამხედრო ოპერაციის დასრულებამდე სახლში დარჩენისკენ მოუწოდა.
მედიის ინფორმაციით, პოლონელმა სამხედროებმა ღამით ჩამოაგდეს ობიექტები, რომლებმაც ქვეყნის საჰაერო სივრცე დაარღვიეს.
დროებით დაიხურა ვარშავის, ლუბლინისა და ჟეშუვის აეროპორტები.
