პოლონეთის პრემიერ-მინისტრმა დონალდ ტუსკმა ოპოზიციის საპრეზიდენტო კანდიდატის, კაროლ ნავროცკის, დაპირებას, რომ უკრაინის ნატო-ში გაწევრიანებას არ დაუშვებს, სახელმწიფო ღალატი“ უწოდა.
„პოლონეთის პრეზიდენტობის კანდიდატი, ფაქტობრივად, მხოლოდ ბატონი მენცენის მოსაწონებლად, ერთ-ერთ სატელევიზიო გადაცემაში ამბობს, რომ პოლონეთი არასდროს დათანხმდება უკრაინის ნატო-ში გაწევრიანებას... ამისთვის სახელწმიფო ღალატზე უკეთესი ტერმინი არ მოიძებნება“, - განაცხადა ტუსკმა.
მან დასძინა, რომ ეს „ამ კამპანიის ერთ-ერთ ყველაზე დიდ სკანდალად“ მიიჩნია.
„როგორც გახსოვთ, პრემიერ-მინისტრობის დროს ჩემსა და გარდაცვლილ პრეზიდენტ ლეხ კაჩინსკის შორის სრული კონსენსუსისა და სრული სოლიდარობის მიღწევა ცოტა საკითხში იყო შესაძლებელი...
მაგრამ უკრაინის საკითხთან, მის სუვერენიტეტთან, პროდასავლურ პოზიციასთან და ნატო-ში წევრობასთან დაკავშირებით სრული თანხმობა იყო“, - აღნიშნა ტუსკმა.
მან აღნიშნა, რომ უკრაინის ნატო-ში წევრობა „ფუნდამენტურია პოლონეთის უსაფრთხოების თვალსაზრისით.
პოლონეთში საპრეზიდენტო არჩევნების პირველი ტური 18 მაისს გაიმართა. ხმათა 50 პროცენტის მიღება ვერცერთმა კანდიდატმა ვერ შეძლო, რაც ნიშნავს, რომ არჩევნების მეორე ტური გაიმართება. არჩევნების მეორე ტური პირველ ივნისს ჩატარდება, რომელშიც მონაწილეობას მიიღებენ მმართველი პარტიის კანდიდატი, ვარშავის მერი რაფალ ტშასკოვსკი, რომელმაც ხმების 31,36% მოიპოვა, და კაროლ ნავროცკი, რომელსაც მხარს უჭერს მემარჯვენე-კონსერვატიული პარტია „კანონი და სამართლიანობა“, რომელმაც პირველ ტურში ხმების 29,54% მიიღო.
