ხვალ, 27 ნოემბერს, საფრანგეთში მყოფ ქართველ ლტოლვილთა სათვისტომო პარიზში აქციას გამართავს და საფრანგეთის პრეზიდენტს, ნიკოლა სარკოზის მოუწოდებენ, მოახდონოს ზეწოლა რუსეთზე, იმისათვის, რომ შესრულდეს 2008 წლის აგვისტოს ცეცხლის შეწყვეტის შესახებ შეთანხმება.
ქართველ სათვისტომოს წარმომადგენელთა განცხადებით, 2008 წელს სარკოზიმ, როგორც ევროკავშირის მაშინდელმა პრეზიდენტმა,მიაღწია საქართველოში რუსის ჯარის შემოსევის შეჩერებას და შეთანხმების ხელმოწერას, თუმცა აღებული ვალდებულების მიუხედავად რუსული საოკუპაციო ჯარები დღესაც ცდილობენ ქართული ტერიტორიების ანექსიას.
"არღვევს რა ხელმოწერილ შეთანხმებას; რუსეთი ევროპელ დამკვირვებლებს ოკუპირებულ ტერიტორიებზე შესვლას უკრძალავს. აგებს რა "სირცხვილის კედელს'', რუსეთი ამ ტერიტორიების იზოლირებას ახდენს და 300 000 ქართველს შინ დაბრუნებას უკრძალავს. ოკუპირებულ ტერიტორიებზე რუსეთი ამ წუთასაც სამხედრო ბაზებს აშენებს. რუსეთმა დღეს განაახლა გუშინდელი სსრკ-ის იმპერიალისტური ქცევები.
რუსეთის ხელისუფლების "მცდელობები" მიმართულია პატარა საქართველოს მიმართ.
რუსეთმა დღეს თავისი ანტიჰუმანური და ავტოკრატული ქცევებით გუშინდელი სსრკ განაახლა", _ აცხადებენ სათვისტომოს წარმომადგენლები.
ისინი მიიჩნევენ, რომ პრეზიდენტმა სარკოზიმ როგორც მთავარმა ავტორმა და მოწმემ თვალყური უნდა ადევნოს რუსეთის მიერ 2008 წლის აგვისტოში აღებული ვალდებულების შესრულებას.
"როდესაც რუსეთს აჩუმებენ, საქართველოში ბეტონის კედელს აღმართავენ, ევროპას სამარესE უთხრიან. საფრანგეთში მყოფ ქართველ ლტოლვილთა სათვისტომო მოგიწოდებთ მოხვიდეთ და მხარი დაუჭიროთ მათ, ვისაც რუსეთის ხელისუფლება საფრთხეს უქმნის. პარასკევს 27 ნოემბერს 17 საათზე კლემანსოს მოედანზე და პროტესტი გამოხატოთ ყოველივე ამის წინააღმდეგ", _ ნათქვამია განცხადებაში.