აშშ-ის პრეზიდენტმა დონალდ ტრამპმა არ გამორიცხა, რომ უკრაინამ და რუსეთმა, შესაძლოა, სამშვიდობო შეთანხმებას ვერ მიაღწიონ, მხარეებს შორის უდიდესი სიძულვილის გამო. ამის შესახებ ტრამპმა NBC News-თან ინტერვიუში განაცხადა.
ომსა და ტრამპის ადმინისტრაციის მიერ მისი დასრულების მცდელობების შესახებ დასმულ შეკითხვაზე, ტრამპმა განაცხადა, რომ იყო მომენტები, როდესაც ის შუამავლის როლზე უარის თქმასთან ახლოს იყო.
„ხანდახან ახლოს ვიყავი, მაგრამ დადებითი რაღაცები მოხდა“, - თქვა ტრამპმა “
ამავდროულად, მან დაადასტურა, რომ ამის გაკეთება ჯერ კიდევ შეუძლია. „დადგება, დრო, როდესაც ვიტყვი: „კარგით, ასე გააგრძელეთ სისულელეების კეთება და ბრძოლა”,- თქვა ტრამპმა.
მან აღიარა, რომ ორ ქვეყანას შორის შეთანხმების მიღწევა შესაძლოა არარეალური იყოს, თუმცა მიაჩნია, რომ შეთანხმების მიღწევა, შესაძლოა ახლოსაც იყოს.
ჟურნალისტის შეკითხვაზე, თუ სად მდებარეობს წითელი ხაზი, რომლის შემდეგაც იგი პოლიტიკას შეცვლის, აშშ-ის პრეზიდენტმა უპასუხა, რომ "მოვა დრო, როდესაც შესაძლოა ეს ვთქვა და თუ ამას ვიზამ... შესაძლოა, შეთანხმების მიღწევა შეუძლებელია. რომ გესმოდეთ, ძალიან დიდი სიძულვილია ამ ორ კაცს შორის და ზოგიერთ სამხედროს შორის, გენერლებს შორის, ისინი ძლიერად იბრძვიან უკვე მესამე წელია. ჩემი აზრით, ძალიან კარგი შანსი გვაქვს ამის გაკეთების [შეთანხმების დადების]".
ტრამპმა ასევე განაცხადა, რომ რუსეთ-უკრაინის მოლაპარაკებებში აშშ ერთ მხარესთან უფრო ახლოსაა შეთანხმების მიღწევის მხრივ, ვიდრე - მეორესთან. მან ასევე კიდევ ერთხელ მიანიშნა, რომ სამშვიდობო შეთანხმების ვერ დადების შემთხვევაში, აშშ კონფლიქტთან მიმართებით პოლიტიკას შეცვლის.
