აშშ-ის პრეზიდენტმა დონალდ ტრამპმა, უკრაინასთან სასარგებლო წიაღისეულის მოპოვების შესახებ შეთანხმების ხელმოწერის კომენტირებისას, განაცხადა, რომ იმედოვნებს, რომ ამ შეთანხმებიდან უფრო მეტს მიიღებს, ვიდრე ის 350 მილიარდი დოლარი, რომელიც წინა ადმინისტრაციამ კიევის მხარდასაჭერად დახარჯა.
„ჩვენ დავდეთ შეთანხმება, რომლის მიხედვითაც თეორიულად 350 მილიარდ დოლარზე გაცილებით მეტს მივიღებთ“, - განაცხადა ტრამპმა News Nation-ის ეთერში.
მან დასძინა, რომ გარიგება წარმოადგენს ანაზღაურებას იმ 350 მილიარდი დოლარისთვის, რომელიც „ბაიდენმა მათ გადასცა“.
ვატიკანში უკრაინის პრეზიდენტ ვოლოდიმირ ზელენსკისთან საუბრის შინაარსის შესახებ დასმულ შეკითხვაზე ტრამპმა უპასუხა: „მე ვუთხარი, რომ ძალიან კარგი იქნებოდა, თუ შეთანხმებას მივაღწევდით და თქვენ მას ხელს მოაწერდით“.
ამერიკის პრეზიდენტმა ასევე დადებითად უპასუხა შეკითხვას, შეიძლება თუ არა აშშ-ის ყოფნამ უკრაინაში შეაფერხოს რუსეთის წინსვლა რეგიონში. „შესაძლოა, ასეც იყოს“, - თქვა ტრამპმა.
შეგახსენებთ, აშშ-მა და უკრაინამ ხელი მოაწერეს წიაღისეულის შეთანხმებას და საინვესტიციო ფონდის შექმნაზე შეთანხმდნენ.
