ბოჭორმის ქუჩაზე სასროლეთში მომხდარი აფეთქების შედეგად დაშავებულები დამწვრობის ცენტრში არიან მოთავსებული.
ექიმების თქმით, განსაკუთრებით მძიმეა შუახნის მამაკაცის ჯანმრთელობის მდგომარეობა. 59 წლის კაცს დამწვრობები გულმკერდის და კიდურების გარდა, სასუნთქ გზებზეც აღენიშნება.
„კლინიკაში არის შემოსული სამი მამაკაცი. აფეთქების შედეგად მიღებული აქვთ სხვადასხვა სახის ტრავმები. ერთ-ერთი მათგანი, 59 წლის მამაკაცი არის მოთავსებული რეანიმაციულ განყოფილებაში, დაზიანებული აქვს თავი, გულმკერდის წინა და უკანა ზედაპირი. ამას ემატება სასუნთქი გზების თერმული ინჰალაციური დაზიანება და ბაროტრავმა, რაც ამ აფეთქებამ გამოიწვია. ორი მამაკაცი არის მოთავსებული ქირურგიულ განყოფილებაში, 30 და 39 წლის მამაკაცები, მათი მდგომარეობა სტაბილურია და სიცოცხლეს საფრთხე ამ ეტაპზე არ ემუქრება. რაც შეეხება 59 წლის მამაკაცს, გვაქვს საკმაოდ სერიოზული დაზიანებები, თუმცა მისი მდგომარეობა გამომდინარე ტრავმიდან, ამ წუთისათვის, არის თავიდან ბოლომდე სტაბილური“, – განაცხადა ქაშიბაძემ.
ბოჭორმის ქუჩაზე, ერთ-ერთ მაღაზია „ბეთლგრაუნდის“ სასროლეთში აფეთქება მოხდა. შინაგან საქმეთა სამინისტროს ცნობით, აფეთქების შედეგად დაღუპულია ორი და დაშავებულია ოთხი ადამიანი.
