უკრაინამ უნდა შეარბილოს მიდგომა რუსეთთან ერთობლივი ნაბიჯების გადადგმისთვის “მარცვლეულის შეთანხმების გასაგრძელებლად, – ამის შესახებ თურქეთის პრეზიდენტმა, რეჯეფ თაიფ ერდოღანმა სოჭში რუსეთის პრეზიდენტთან, ვლადიმირ პუტინთან ერთობლივ პრესკონფერენციაზე განაცხადა.
როგორც ერდოღანმა განაცხადა, „მარცვლეულის შეთანხმების“ შემოთავაზებული ალტერნატივები არ არის მდგრადი, უსაფრთხო და მუდმივი, ისეთი, როგორიც შავი ზღვის ინიციატივაა.
„მიგვაჩნია, რომ ინიციატივა უნდა გაგრძელდეს ხარვეზების აღმოფხვრით. ჩვენ მზად ვართ, გავაგრძელოთ ძალისხმევა ჩვენს რეგიონში გრძელვადიანი მშვიდობის, სტაბილურობისა და კეთილდღეობის დასამყარებლად. ჩვენ გაერო-სთან ერთად მოვამზადეთ წინადადებების ახალი პაკეტი, რომელიც მოიცავს მნიშვნელოვან პროგრესს. მე მჯერა, რომ ამ ახალი პროცესით შედეგის მიღწევა შესაძლებელია. უკრაინამ, რა თქმა უნდა, უნდა შეარბილოს მიდგომა რუსეთთან ერთობლივი ნაბიჯების გადადგმისთვის“, – განაცხადა რეჯეფ თაიფ ერდოღანმა პუტინთან გამართული შეხვედრის შემდეგ.
