საქართველოს პრეზიდენტმა, სალომე ზურაბიშვილმა ესტონეთისა და ლიეტუვის პრეზიდენტებთან სატელეფონო საუბარი გამართა.
„ესტონეთის პრეზიდენტთან სატელეფონო საუბრისას, ალარ კარისმა დაადასტურა საქართველოს ევროპული გზის მხარდაჭერა. გზის, რომელიც ისტორიულად ქართველმა ხალხმა აირჩია“, – წერს ზურაბიშვილი „ტვიტერში.“
სალომე ზურაბიშვილთან გამართული სატელეფონო საუბრის შემდეგ „ტვიტერზე“ დაწერა ესტონეთის პრეზიდენტმაც.
„ქართველმა ხალხმა აირჩია საკუთარი გზა და ის ევროპისკენ მიდის. ესტონეთი მხარს უჭერს საქართველოს ამ გზაზე. სატელეფონო საუბარში საქართველოს პრეზიდენტს ვუთხარი, რომ მნიშვნელოვანია, გაგრძელდეს მუშაობა 12 პრიორიტეტულ რეფორმაზე, რომელიც ევროკომისიამ წარმოადგინა“, – წერს ალარ კარისი „ტვიტერის“ გვერდზე.
სალომე ზურაბიშვილთან სატელეფონო საუბრის შესახებ წერს ლიეტუვის პრეზიდენტი გიტანას ნაუსედაც.
„განვიხილეთ საქართველოში მიმდინარე მოვლენები პრეზიდენტ ზურაბიშვილთან ერთად. დავარწმუნეთ ის, რომ ლიეტუვა მხარს უჭერს საქართველოს ევროინტეგრაციის ძალისხმევას. ლიეტუვა მზადაა, დაეხმაროს საქართველოს აუცილებელი რეფორმების გზაზე“, – წერს გიტანას ნაუსედა.
