აშშ-ის პრეზიდენტის ადმინისტრაცია უკრაინისთვის Patriot-ის ტიპის საზენიტო სისტემების გადასაცემად ემზადება.

გადაწყვეტილების მიღება ამ კვირაში უნდა მოხდეს, წერს CNN-ი მაღალი თანამდებობის პირებზე დაყრდნობით.

პენტაგონის ეს გეგმა აშშ-ის თავდაცვის მდივანმა ლოიდ ოსტინმა უნდა დაამტკიცოს. CNN-ის წყაროების ცნობით, მოელიან, რომ გეგმა დამტკიცდება.

ჯერჯერობით უცნობია, Patriot-ის რამდენ ერთეულს გადასცემენ უკრაინას.

როგორც BBC წერს, შორი მანძილის გარდა Patriot-ის მთავარ ღირსებას წარმოადგენს მისი შესაძლებლობა, ებრძოლოს ბალისტიკურ რაკეტებს. უკრაინის საჰაერო თავდაცვას  ამჟამად არ აქვს საბრძოლო საშუალებები ისეთი რაკეტების წინააღმდეგ, რომელსაც  რუსეთი იყენებს.

ფრთოსანი რაკეტებისგან განსხვავებით, რომელიც მიზნისკენ თვითმფრინავივით მიქრის, ბალისტიკური რაკეტები მაღლა მიფრინავს, შემდეგ კი მაღალი სიჩქარით სამიზნეს ანადგურებს. ასეთი სამიზნის განადგურება ძალიან რთულია. როგორც უკრაინელი სამხედროები და ექსპერტები ამბობენ, რუსული „ისკანდერებისგან“ დაცვა არ შეუძლია დასავლეთის სისტემებს IRIS-T-სა და NASAMS-ს.

ბოლო პერიოდში რუსეთი არც თუ ხშირად იყენებს ამ საშუალებებს, ისე, როგორც ომის დასაწყისში იყენებდა, მაგრამ იმ ინფორმაციების გათვალისწინებით, რომელიც საერთაშორისო მედიაში ნოემბრის ბოლოს გავრცელდა, მოსკოვი ცდილობს ბალისტიკური რაკეტები თეირანისგან იყიდოს, ამასთან, შესაძლოა, საუბარი იყოს ასობით რაკეტაზე.

თუ რუსეთის არმიას აღნიშნული შეიარაღება ექნება, შეძლებს ახალი ძალით და გაცილებით ეფექტურად მიაყენოს დარტყმები უკრაინის კრიტიკული მნიშვნელობის ინფრასტრუქტურას.

საერთაშორისო საზოგადოება უკვე ცდილობს ზეწოლა მოახდინოს ირანზე, რადგან ასეთმა სამხედრო-ტექნიკურმა თანამშრომლობამ, შესაძლოა, გააძლიეროს არამხოლოდ მოსკოვი, არამედ თეირანიც, რაც ბევრ ქვეყანას ძალიან აღელვებს.

BBC აღნიშნავს, რომ ვინაიდან დიპლომატია უძლურია და უკრაინის საჰაერო თავდაცვა ახალი საფრთხის წინააღმდეგ ბრძოლისთვის საშუალებებს ეძებს, Patriot-ის ტიპის  საზენიტო სარაკეტო კომპლექსები ამ საშუალებებიდან ერთ-ერთია, რომლის დახმარებითაც უკრაინის თავდაცვა მტრის თავდასხმებს ეფექტურად უპასუხებს.