რუსეთის საგარეო საქმეთა სამინისტროს განცხადებით, საპასუხო ზომების ფარგლებში, ქვეყნიდან 14 ბულგარელი დიპლომატი გააძევა.
ნოტა დიპლომატების პერსონა ნონ გრატად გამოცხადების შესახებ გადაეცა ბულგარეთის ელჩს რუსეთში ათანას კრისტინს, რომელიც საგარეო საქმეთა სამინისტროში იყო დაბარებული.
რუსეთის საგარეო საქმეთა სამინისტროს განცხადებით, ეს გადაწყვეტილება არის პასუხი სოფიას გადაწყვეტილებაზე, რომლის თანახმადაც ბულგარეთიდან 70 რუსი დიპლომატი გააძევეს და ქალაქ რუსეში დროებით დახურეს რუსეთის გენერალური საკონსულო.
შეგახსენებთ, 28 ივნისს ბულგარეთმა, რომელიც ევროკავშირისა და ნატოს წევრია, ჯაშუშური საქმიანობის გამო რუსეთის საელჩოს 70 თანამშრომლის გაძევების შესახებ განაცხადა.
რუსეთმა ბულგარეთს წაუყენა ულტიმატუმი და დაემუქრა საელჩოს დახურვით, თუ სოფია 1-ლი ივლისის შუადღისთვის არ გააუქმებდა გაძევების გადაწყვეტილებას. სოფიამ უარი თქვა კრემლის ულტიმატუმის შესრულებაზე.
რუსეთის ელჩმა ბულგარეთში ელეონორა მიტროფანოვამ განაცხადა, რომ ის რუსეთის ხელისუფლებასთან სოფიაში საელჩოს დახურვის საკითხს დააყენებს. რუსეთის საგარეო საქმეთა მინისტრმა სერგეი ლავროვმა პირობა დადო, რომ მოსკოვი საპასუხო ზომებს მიიღებს.
