საფრანგეთის პარლამენტის ქვედა პალატამ, ეროვნულმა ასამბლეამ ფინეთისა და შვედეთის ნატო-ში გაწევრიანების პროტოკოლის ეროვნულ დონეზე რატიფიცირება მოახდინა.
მანამდე, პროტოკოლის რატიფიცირება პარლამენტის ზედა პალატამ, სენატმა განახორციელა.
"შვედეთისა და ფინეთის წევრობა ჩვენს ალიანსს გააძლიერებს, რათა დავიცვათ ჩვენი ფასეულობები და ცხოვრების წესი და ჩვენი თავისუფლება მათგან, ვინც საფრთხეს უქმნის მათ", - დაწერა საფრანგეთის საგარეო საქმეთა მინისტრმა კატრინ კოლონამ სოციალურ ქსელში.
შეგახსენებთ, ფინეთისა და შვედეთის ნატო-ში გაწევრიანების პროტოკოლის რატიფიცირება უკვე მოახდინეს იტალიამ, ალბანეთმა, ბელგიამ, ბულგარეთმა, კანადამ, ხორვატიამ, დანიამ, ესტონეთმა, გერმანიამ, ისლანდიამ, ლატვიამ, ლიეტუვამ, ლუქსემბურგმა, მონტენეგრომ, ნიდერლანდებმა, ჩრდილოეთ მაკედონიამ, ნორვეგიამ, პოლონეთმა, დიდმა ბრიტანეთმა, რუმინეთმა, სლოვენიამ.
ფინეთისა და შვედეთის ალიანსში გაწევრიანება საბოლოოდ დასრულდება მას შემდეგ, რაც ყველა წევრი ქვეყნის პარლამენტი პროტოკოლების რატიფიცირებას მოახდენს. ამ პროცესს შესაძლოა ექვსიდან რვა თვემდე დასჭირდეს.
29 ივნისს ნატომ ოფიციალურად მიიწვია შვედეთი და ფინეთი ალიანსში გასაწევრიანებლად.
უკრაინაში რუსეთის მიერ გაჩარებული ომის ფონზე, შვედეთმა და ფინეთმა ნატოში გაწევრიანების განაცხადები ბრიუსელში 18 მაისს წარადგინეს. თავდაპირველად, თურქეთმა განცხადებების განხილვის პროცესი დაბლოკა, თუმცა მოგვიანებით ვეტო მოხსნა.
