რუსული გაზის კონცერნი "გაზპრომი" აცხადებს, რომ ლატვიას ბუნებრივი აირის მიწოდება შეუწყვიტა.
კომპანიის მიერ გავრცელებულ განცხადებაში აღნიშნულია, რომ ბუნებრივი აირის მიწოდებას წყვეტს ლატვიის მიერ პირობების დარღვევის გამო, თუმცა არ აკონკრეტებს რა პირობებს გულისხმობს.
ლატვიის გაზის გადამცემი სისტემის Conexus Baltic Grid-ის თანახმად, 30 ივლისის მდგომარეობით, გაზი ლატვიის მიმართულებით ჯერ კიდევ მიედინება, თუმცა ნაკადი დასაშვები სიმძლავრის ნახევარს შეადგენს.
მანამდე, რუსეთმა გაზის მიწოდება შეუწყვიტა პოლონეთს, ბულგარეთს, ფინეთს, ნიდერლანდებსა და დანიას, რომლებმაც უარი განაცხადეს საფასურის რუბლით გადახდაზე. "გაზპრომმა" ასევე შეაჩერა კომპანია Shell Energy Europe-ისთვის ბუნებრივი აირის მიყიდვა გერმანიაში.
27 ივლისს "გაზპრომმა" მკვეთრად შეამცირა ევროპისთვის გაზის მიწოდება "ჩრდილოეთის ნაკადის" გავლით, რაც ახსნა პროფილაქტიკური სამუშაოების აუცილებლობით.
ევროპული ქვეყნები აცხადებენ, რომ მოსკოვი ენერგომომარაგებას შანტაჟის იარაღად იყენებს.
შეგახსენებთ, 14 ივლისს ლატვიის პარლამენტმა მიიღო კანონში ცვლილებები, რომლის თანახმადაც, 2023 წლის 1 იანვრიდან რესპუბლიკაში რუსეთიდან ბუნებრივი აირის მიწოდება აიკრძალება.
