თურქული კომპანია Baykar უკრაინას საჩუქრად გადასცემს უპილოტო საფრენ აპარატ "ბაირაქთარს", რომლის შესაძენადაც პოლონელებმა 5 მილიონი ევრომდე მოაგროვეს. ინფორმაციას ავრცელებს ჟურნალისტი სლავომირ სერაკოვსკი, რომლის ინიციატივითაც დაიწყო პოლონეთში საბრძოლო დრონის შესყიდვის კამპანია.
სერაკოვსკიმ სოციალურ ქსელში გამოაქვეყნა Baykar-ის დირექტორთა საბჭოსგან მიღებული წერილი, სადაც აღნიშნულია, რომ კომპანიის მესვეურები აღფრთოვანებას გამოხატავენ იმ ათეულ ათასობით პოლონელის მიმართ, ვინც დრონის შესაძენად შემოწირულობა გაიღო.
"ჩვენ გვინდა ვიყოთ სოლიდარობის ამ ადამიანური ჟესტის ნაწილი... ჩვენ უსასყიდლოთ გადავცემთ უკრაინას უპილოტო საფრენ აპარატს - Bayraktar TB2-ს, რათა მათ შეძლონ სამშობლოს დაცვა საუკეთესო გზით", - ნათქვამია კომპანიის დირექტორთა საბჭოს წერილში.
პოლონეთში შეგროვილი თანხა კი, რომელიც დაახლოებით 22.5 მილიონ ზლოტს შეადგენს, უკრაინულ და თურქულ მხარეებთან შეთანხმებით, ომის შედეგად დაზარალებული უკრაინელების ჰუმანიტარულ დახმარებას მოხმარდება.
პირველი ქვეყანა, რომლის მოქალაქეებმა უკრაინისთვის Bayraktar-ის გადასაცემად თანხის შეგროვება დაიწყეს, ლიეტუვა იყო. მაშინ დრონის შესაძენად საჭირო თანხა სულ რაღაც 3 დღეში შეგროვდა.
მოგვიანებით, Bayraktar-ის მწარმოებელმა თურქულმა კომპანიამ საბრძოლო დრონი, რომლის შესაძენადაც ლიეტუველებმა თანხა შეაგროვეს, უკრაინას საჩუქრად გადასცა. ლიეტუველების შეგროვებული თანხა კი უკრაინის სხვა საჭიროებებს მოხმარდა.
