უკრაინის უმაღლესი რადა დაეთანხმა პრეზიდენტ ვოლოდიმირ ზელენსკის წარდგინებას უკრაინის გენერალური პროკურორის თანამდებობაზე ანდრიის კოსტინის დანიშვნის თაობაზე.
კოსტინი მმართველი პარტია "ხალხის მსახურის" დეპუტატია და ბოლო დრომდე რადის იურიდიული პოლიტიკის კომიტეტს თავმჯდომარეობდა.
როგორც იუწყებიან, კოსტინის კანდიდატურას 299 სახალხო დეპუტატი მიემხრო. კენჭისყრას ვოლოდიმირ ზელენსკიც ესწრებოდა.
ანდროი კოსტინი არის მე-9 მოწვევის უმაღლესი რადის სახალხო დეპუტატი "ხალხის მსახურის" პარტიიდან. 2010 წლიდან 2019 წლამდე ის იყო ოდესის საკრებულოს დეპუტატი.
უკრაინის გენერალური პროკურორის თანამდებობა მას შემდეგ იყო ვაკანტური, რაც ვოლოდიმირ ზელენსკიმ ირინა ვენედიქტოვა 17 ივლისს გაათავისუფლა.
