ლიეტუვამ რუსეთის მართლმადიდებლური ეკლესიის მეთაურს, პატრიარქ კირილს, უკრაინაში გაჩაღებული ომის მხარდაჭერის გამო, ქვეყანაში შესვლა აუკრძალა. ინფორმაციას გამოცემა LRT ავრცელებს ლიეტუვის შინაგან საქმეთა სამინისტროზე დაყრდნობით.
როგორც იუწყებიან, პატრიარქ კირილს ლიეტუვაში შესვლა ჯერ კიდევ 23 ივნისიდან აეკრძალა, თუმცა ინფორმაცია ამ დრომდე არ გახმაურებულა.
პატრიარქ კირილს ლიეტუვაში ჩასვლა 2027 წლის 23 ივნისამდე აეკრძალა.
გადაწყვეტილება ლიეტუვის შინაგან საქმეთა სამინისტრომ საგარეო საქმეთა სამინისტროს წინადადების საფუძველზე მიიღო.
შინაგან საქმეთა სამინისტროს ცნობით, პატრიარქი კირილი მიზანმიმართულად უარყოფს უკრაინის ტერიტორიულ მთლიანობასა და სუვერენიტეტს, ამართლებს და მხარს უჭერს რუსეთის აგრესიულ ქმედებებს, უხეშად არღვევს საერთაშორისო სამართლის ნორმებსა და პრინციპებს.
"პატრიარქი კირილი, ვლადიმირ პუტინის ახლო თანამოაზრე, არის უკრაინის წინააღმდეგ ომის ერთ-ერთი ყველაზე აქტიური მხარდამჭერი, რომელმაც არაერთხელ საჯაროდ ისაუბრა დადებით კონტექსტში რუსული აგრესიის შესახებ“, - ნათქვამია სამინისტროს განცხადებაში.
2022 წლის 27 თებერვალს პატრიარქმა კირილმა დალოცა უკრაინის წინააღმდეგ ომში მონაწილე რუსი ჯარისკაცები და კანონიკური დასაბუთება მისცა რუსეთის მიერ გაჩაღებულ ომს.
8 ივლისს ცნობილი გახდა, რომ კანადამ კრემლის პროპაგანდისტებს, მათ შორის პატრიარქ კირილს სანქციები დაუწესა. მანამდე, პატრიარქის წინააღდეგ სანქციები დიდმა ბრიტანეთმაც დააწესა.
