ევროკავშირის ქვეყნები გაზის მოხმარების შემცირების საგანგებო გეგმაზე შეთანხმდნენ.
26 ივლისს, ბრიუსელი წევრი ქვეყნების ენერგეტიკების მინისტრების საგანგებო შეხვედრაზე, ხმათა უმრავლესობით დამტკიცდა ევროკომისიის გეგმა, რომელიც გაზის მოხმარების შემცირებას ითვალისწინებს.
როგორც ლუქსემბურგის ენერგეტიკის მინისტრმა კლოდ ტურმესმა აღნიშნა, ერთადერთი ქვეყანა, რომელმაც ხმა ევროკომისიის წინადადების წინააღმდეგი მისცა, უნგრეთი იყო. თუმცა გადაწყვეტილების მისაღებად კვალიფიციური უმრავლესობა საკმარისია.
ახალი გეგმის მიზანია, შეამციროს რისკები, რომლებიც შეიძლება წარმოიშვას რუსეთიდან გაზის მიწოდების სრული შეწყვეტით.
ევროკომისიის მიერ შემოთავაზებული გეგმა ითვალისწინებს ეროვნულ დონეზე გაზის მოხმარების შემცირებას, 2022 წლის 1 აგვისტოდან 2023 წლის 31 მარტამდე, 15 პროცენტით.
გეგმის შესრულება ნებაყოფლობითია. ბლოკის წევრები თავად შეარჩევენ გაზის მოხმარების შემცირების სტრატეგიას. ევროკომისიის წინადადებით, მიზანშეწონილია, მოხმარება შემცირდეს 15%-ით 2016-2012 წლების საშუალო მოხმარებასთან შედარებით.
ამასთან, საგანგებო ვითარების შემთხვევაში, თუ რუსეთიდან გაზის მიწოდება სრულად შეწყდა, ევროკომისია უფლებამოსილი იქნება, შემოიღოს სავალდებულო ზომები, რომელსაც მხარი უნდა დაუჭირონ ევროკავშირის წევრებმა.
შეგახსენებთ, 20 ივლისს ევროკომისიამ ევროპაში გაზის მოხმარების 15%-ით შემცირების გეგმა წარადგინა.
