რუსეთმა განაცხადა, რომ 2024 წლის შემდეგ დატოვებს საერთაშორისო კოსმოსურ სადგურს (ISS), რათა ფოკუსირება მოახდინოს საკუთარი ორბიტალური სადგურის მშენებლობაზე.
იური ბორისოვმა, რომელიც ცოტა ხნის წინ დაინიშნა სახელმწიფო კორპორაცია "როსკოსმოსის" მეთაურად, რუსეთის პრეზიდენტ პუტინთან შეხვედრისას განაცხადა, რომ რუსეთი, საერთაშორისო კოსმოსური სადგურის დატოვებამდე, შეასრულებს თავის ვალდებულებებს სხვა პარტნიორების წინაშე.
ბორისოვის თქმით, გადაწყვეტილება საერთაშორისო კოსმოსური სადგურის 2024 წლის შემდეგ დატოვების თაობაზე უკვე მიღებულია.
ჯერ კიდევ აპრილში, ბორისოვის წინამორბედმა, დმიტრი როგოზინმა განაცხადა, რომ რუსეთი შეწყვეტს თანამშრომლობას საერთაშორისო კოსმოსურ სადგურზე, უკრაინაში შეჭრის გამო რუსეთის წინააღმდეგ დაწესებული სანქციების საპასუხოდ.
როგოზინის მტკიცებით, სანქციები წესდება "რუსეთის ეკონომიკის მოსაკლავად, ჩვენი ხალხის სასოწარკვეთასა და შიმშილში ჩაძირვისთვის და ჩვენი ქვეყნის დაჩოქებისთვის".
ივნისში, როგოზინი აცხადებდა, რომ საერთაშორისო კოსმოსურ სადგუზე მუშაობის გაგრძელებაზე მოლაპარაკებების განახლება შესაძლებელია მხოლოდ იმ შემთხვევაში, თუ აშშ-ის სანქციები მოიხსნება რუსეთის კოსმოსური ინდუსტრიის წინააღმდეგ.
