ჩინეთის არმია საგრძნობლად უფრო აგრესიული და სახიფათო გახდა ბოლო ხუთი წლის განმავლობაში, - განაცხადა აშშ-ის შეიარაღებული ძალების შტაბების მეთაურთა კომიტეტის თავმჯდომარემ, გენერალმა მარკ მილმა ინდონეზიაში ვიზიტისას.
გენერალ მილის განცხადებით, წყნარი ოკეანის რეგიონში ჩინური თვითმფრინავებისა და გემების მიერ დარღვევები და აშშ-სა და მის პარტნიორებთან სახიფათო ურთიერთქმედებები გახშირებულია.
"გზავნილი არის ის, რომ ჩინელი სამხედროები, ჰაერსა და ზღვაში, უფრო და უფროო აგრესიულები გახდნენ კონკრეტულად წყნარი ოკეანისრეგიონში", - თქვა გენერალმა.
გენერალ მილის განცხადებით, ჩინეთი ცდილობს, გააფართოვოს თავისი გავლენა რეგიონში.
"ისინი ცდილობენ, გააფართოონ თავიანთი გავლენა მთელ რეგიონში და ამას მოჰყვება პოტენციური შედეგები, რომლებიც სულაც არ არის ხელსაყრელი ჩვენი მოკავშირეებისა და პარტნიორებისთვის რეგიონში", - განაცხადა მან.
გენერალ მილის ამ განცხადების ფონია შეერთებული შტატების ძალისხმევა, გააძლიეროს წყნარი ოკეანის ქვეყნებთან ურთიერთობები, რათა შეიქმნას ჩინეთის საპირწონე, რომელიც ცდილობს გააფართოოს თავისი ყოფნა და გავლენა რეგიონში.
ბაიდენის ადმინისტრაცია ჩინეთს მიიჩნევს ამერიკის მთავარ გრძელვადიან უსაფრთხოების გამოწვევად.
გენერალ მილის ვიზიტი რეგიონში მკვეთრად არის ორიენტირებული ჩინეთის საფრთხეზე. ის დაესწრება ინდო-წყნარი ოკეანის თავდაცვის მეთაურთა შეხვედრას ავსტრალიაში, სადაც მთავარი თემები იქნება ჩინეთის სამხედრო ზრდის ესკალაცია და თავისუფალი, ღია და მშვიდობიანი წყნარი ოკეანის შენარჩუნების აუცილებლობა.
