დიდი ბრიტანეთის მმართველი კონსერვატიული პარტიის ლიდერობისთვის ბრძოლას 6 კანდიდატი განაგრძობს.

დღეს გამართული არჩევნების პირველ რაუნდში მიღებული შედეგების თანახმად, ბრძოლას ორი კანდიდატი - მოქმედი ხაზინის მდივანი (ფინანსთა მინისტრი) ნადიმ ზაჰავი და თემთა პალატის ჯანმრთელობისა და სოციალური დაცვის კომიტეტის თავმჯდომარე ჯერემი ჰანტი გამოეთიშნენ.

შემდეგ ეტაპზე გადასასვლელად, მათ სულ მცირე 30 თანაპარტიელი დეპუტატის ხმა უნდა მიეღოთ, ზაჰავიმ 25 ხმა მიიღო, ჰანტმა - 18.

პირველ რაუნდში ყველაზე მეტი ხმა მიიღეს და მეორე რაუნდში გადავიდნენ:

რიში სუნაკი, ყოფილი ხაზინის მდივანი - 88 ხმა

პენდი მორდონთი, ყოფილი თავდაცვის მდივანი, ვაჭრობის უმცროსი მინისტრი - 67 ხმა

ლიზ ტრასი, საგარეო საკითხთა მდივანი - 50 ხმა

კემი ბადენოხი, დეპუტატი - 50 ხმა

ტომ ტუგენდატი, თემთა პალატის საგარეო საქმეთა კომიტეტის თავმჯდომარე - 37 ხმა

სუელა ბრეივერმანი, ინგლისისა და უელსის გენერალური პროკურორი - 32 ხმა.

მეორე რაუნდი 14 ივლისს არის დაგეგმილი. როგორც იუწყებიან, შემდგომი ეტაპზე გადასასვლელად საჭირო მინიმალურ ბარიერს დღეს დაადგენენ. თუ პირველ რაუნდში სულ მცირე 30 დეპუტატის მხარდაჭერა იყო საჭირო, მეორე რაუნდში შესაძლოა ეს რაოდენობა 40-დან 50-მდე გაიზარდოს.

არჩევნების რაუნდები გაიმართება იქამდე, ვიდრე ორი კანდიდატი არ დარჩება. ამ ორს შორის არჩევანს კონსერვატიული პარტიის წევრები გააკეთებენ. მოელიან, რომ 5 სექტემბერს უკვე ცნობილი იქნება ბრიტანეთის ახალი პრემიერ-მინისტრის ვინაობა.

შეგახსენებთ, 7 ივლისს ბრიტანეთის პრემიერ-მინისტრმა ბორის ჯონსონმა კონსერვატიული პარტიის ლიდერის თანამდებობა დატოვა. ჯონსონი პრემიერ-მინისტრის მოვალეობის შესრულებას განაგრძობს, ვიდრე კონსერვატიული პარტია ახალ ლიდერს არ აირჩევს.

ფოტო: Sky News