რუსეთმა ბელარუსში მასშტაბური სამხედრო სწავლების "საკავშირო სიმტკიცე 2022"-ის მეორე ეტაპი დაიწყო.
ერთობლივი სამხედრო მანევრები 10 დღის განმავლობაში გაგრძელდება.
რუსეთის თავდაცვის სამინისტროს ინფორმაციით, სწავლებების მიზანი თავდაცვითი ოპერაციის ფარგლებში გარე აგრესიის შეჩერებისა და მოგერიებისთვის მომზადებაა.
წინა დღით, ბელარუსში ჩავიდა რუსეთის შეიარაღებული ძალების გენერალური შტაბის მეთაური, გენერალი ვალერი გერასიმოვი. მანამდე, ბელარუსში წვრთნების მოსამზადებელ ეტაპს რუსეთის თავდაცვის მინისტრი სერგეი შოიგუ დაესწრო.
კრემლის განცხადებით, რუსეთ-ბელორუსის წვრთნები არის ყველაზე დიდი ერთობლივი სამხედრო მანევრები, რაც ოდესმე ჩატარებულა.
"როგორც რუსეთი, ასევე ბელარუსი უპრეცედენტო საფრთხეების წინაშე დგანან, რომელთა ბუნება და, ალბათ, კონცენტრაცია ახლა, სამწუხაროდ, ბევრად უფრო მაღალი და ბევრად უფრო საშიშია, ვიდრე ადრე იყო", - განუცხადა ჟურნალისტებს კრემლის სპიკერმა დიმიტრი პესკოვმა.
მინსკი და მოსკოვი სამხედრო წვრთნებში ჩართული სამხედროებისა და ტექნიკის თაობაზე ზუსტ მონაცემებს არ ავრცელებენ. დასავლური მედიის ცნობით, ბელარუსში რუსეთმა 30 000-მდე ჯარისკაცი, 300 ტანკი, საზენიტო-სარაკეტო კომპლექსები С-400 და ავიაგამანადგურებლები Су-35С გაგზავნა.
ბელარუსში, ერთობლივი წვრთნების ეგიდით, რუსული ძალების მასშტაბური განლაგება შეშფოთებას იწვევს შეერთებულ შტატებსა და ევროპაში. ჩრდილოატლანტიკური ალიანსის გენერალური მდივნის, იენს სტოლტენბერგის განცხადებით, ბოლო დღეებში რუსეთმა ბელარუსში 30 000-ზე მეტი სამხედრო მოსამსახურე და თანამედროვე შეიარაღება გადასხა.
მისი თქმით, ეს არის მოსკოვის ყველაზე დიდი სამხედრო განლაგება ბელარუსში ცივი ომის დასრულების შემდეგ.
სამხედრო ანალიტიკოსები აცხადებენ, რომ მოსკოვის მიერ ბელარუსში მიმდინარე სამხედრო წვრთნები, უკრაინისთვის ახალ საფრთხეს ქმნის. მათი თქმით, ბელარუსიდან რუსული ჯარები უკრაინის დედაქალაქ კიევთან უფრო ახლოს არიან განლაგებულნი.
"საგარეო პოლიტიკის კვლევის ინსტიტუტის" სამხედრო ანალიტიკოსი რობ ლი "ამერიკის ხმასთან" ამბობს, რომ თუ რუსეთი ბელარუსში შორ მანძილზე მრავალჯერადი გაშვების სარაკეტო სისტემებს განათავსებს, კიევის მახლობლად სამიზნეებზე დარტყმას, უკრაინაში შეჭრის გარეშეც შეძლებს.
რუსეთი და ბელარუსი ერთობლივ სამხედრო წვრთნებს რეგულარულად მართავენ.
ბოლო მასშტაბური სწავლება "ზაპად 2021" სექტემბერში გაიმართა და მასში 200 000 სამხედრო მოსამსახურე, 80 თვითმფრინავი და ვერტმფრენი, 760 ერთეული სამხედრო ტექნიკა და 15 გემი მიიღებენ მონაწილეობდა.
