გერმანიის დედაქალაქ ბერლინში კანცლერ ოლაფ შოლცის, საფრანგეთის პრეზიდენტ ემანუელ მაკრონისა და პოლონეთს პრეზიდენტ ანდჟეი დუდას შეხვედრა გაიმართა.
შეხვედრის დასრულების შემდეგ, რომლის მთავარი თემა უკრაინის ირგვლივ არსებული ვითარება და სამხედრო კონფლიქტის დეესკალაცია იყო, ლიდერებმა ერთობლივი პრესკონფერენცია გამართეს.
"ჩვენი საერთო ამოცანაა ევროპაში ომის თავიდან აცილება", - განაცხადა გერმანიის კანცლერმა ოლაფ შოლცმა ერთობლივ პრესკონფერენციაზე.
"ჩვენ ყველას გვაერთიანებს ერთი მიზანი - შევინარჩუნოთ მშვიდობა ევროპაში დიპლომატიის და ერთობლივი მოქმედების მზაობის გზით", - განაცხადა შოლცმა.
მან კიდევ ერთხელ გაიმეორა შეშფოთება უკრაინის საზღვრებთან რუსული ჯარების კონცენტრაციის გამო.
"უკრაინის ტერიტორიული მთლიანობისა და სუვერენიტეტის დარღვევა მიუღებელია და რუსეთისთვის შორმიმავალი შედეგები მოჰყვება - პოლიტიკური, ეკონომიკური და რაღა თქმა უნდა გეოსტრატეგიული თვალსაზრისით", - თქვა კანცლერმა შოლცმა.
ოლაფ შოლცის განცხადებით, ბერლინს, პარიზსა და ვარშავას სურთ, რომ ერთობლივად მიაღწიონ უკიდურესად დაძაბული ვითარების დეესკალაციას.
"ჩვენ გვჭირდება მოლაპარაკებები და გამოსავლის ძიება", - დასძინა მან.
თავის მხრივ, მაკრონმა განაცხადა, რომ გერმანიას, პოლონეთს და საფრანგეთს აქვთ მკაფიო მიზანი - თავიდან აიცილონ ომი უკრაინაში.
საფრანგეთის პრეზიდენტის თქმით, "ერთადერთი გზა, რომელიც უკრაინაში მშვიდობის უზრუნველყოფის საშუალებას მოგვცემს" არის დიალოგი რუსეთთან.
როგორც პოლონეთის პრეზიდენტმა დუდამ აღნიშნა, შოლცთან და მაკრონთან შეხვედრამ ცხადჰყო, რომ ევროკავშირს აქვს ნება, ეძებოს გზები უკრაინის გარშემო არსებული კრიზისის მოსაგვარებლად.
"ჩვენ უნდა ვიპოვოთ გამოსავალი ომის თავიდან ასაცილებლად", - თქვა პოლონეთის პრეზიდენტმა, "მე ვფიქრობ, რომ ჩვენ შეგვიძლია ამის გაკეთება".
