იტალიის საგარეო საქმეთა მინისტრმა ლუიჯი დი მაიომ პარლამენტის თავდაცვისა და საგარეო საქმეთა კომიტეტების გაერთიანებულ სხდომაზე, უკრაინის ირგვლივ არსებულ ვითარებასა და ნატო-ს ღია კარის პოლიტიკის პრინციპებზე ისაუბრა.
სიტყვით გამოსვლისას იტალიის საგარეო საქმეთა მინისტრმა საქართველოს მხარდამჭერი განცხადებაც გააკეთა.
ლუიჯი დი მაიოს განცხადებით, იტალიის მთავრობა ძალ-ღონეს არ იშურებს, რათა უკრაინაში სამხედრო ესკალაცია თავიდან იქნეს აცილებული.
"ვმუშაობთ, რათა თავიდან ავიცილოთ სამხედრო ესკალაციის შემაშფოთებელი რისკი", - განუცხადა მან დეპუტატებს.
მინისტრის განცხადებით, სამხედრო ესკალაცია გამოიწვევს უმძიმეს შედეგებს ჰუმანიტარული, გეოპოლიტიკური და ეკონომიკური თვალსაზრისით.
მისივე თქმით, ნატო უკრაინასა და საქართველოს კარს ვერ დაუკეტავს, მიუხედავად იმისა, რომ "მოსკოვისთვის ეს "წითელი ხაზია".
"ნატო-ს, რა თქმა უნდა, არ შეუძლია უარი თქვას ღია კარის პრინციპზე და 2008 წლის ბუქარესტის სამიტზე კიევისა და თბილისის მიმართ აღებულ ვალდებულებებზე, რომელიც საქართველოს და უკრაინას მომავალში ალიანსში გაწევრიანების საშუალებას აძლევს", - თქვა ლუიჯი დი მაიომ.
ამავდროულად, იტალიის საგარეო საქმეთა მინისტრმა აღნიშნა, რომ შიდა რეფორმების პროცესი, რომელიც კიევმა უნდა გაატაროს ნატოს სტანდარტებთან მიახლოების მიზნით, ჯერ კიდევ არასრულყოფილია.
