რუსეთსა და დასავლეთს შორის მზარდი დაძაბულობის ფონზე, ნატო-ს აღმოსავლეთ ფლანგის გაძლიერების მიზნით, დიდი ბრიტანეთი პოლონეთში დამატებით 350 სამხედროს გზავნის. ამის შესახებ ბრიტანეთის თავდაცვის მდივანმა ბენ უოლესმა ლონდონში პოლონელ კოლეგასთან მარიუშ ბლაშაკთან შეხვედრის შემდეგ განაცხადა.
ბენ უოლესმა აღნიშნა, რომ დამატებითი ბრიტანული ძალების განლაგება იქნება სიგნალი იმისა, რომ ბრიტანეთი და პოლონეთი "მხარდამხარ დგანან" არსებულ დაძაბულ სიტუაციაში.
ბრიტანეთის თავდაცვის მდივანმა კიდევ ერთხელ აღნიშნა, რომ თუ რუსეთი "უგუნურ შეცდომას" დაუშვებს და შეიჭრება სუევერენულ სახელმწიფოში, მკაცრი სანქციები ამოქმედდება.
მარიუშ ბლაშაკმა, თავის მხრივ, აღნიშნა, რომ ვარშავა და ლონდონი მზად არიან გადადგან შემდგომი ნაბიჯები, რათა თავიდან აიცილონ რუსეთის პოტენციური შეჭრა უკრაინაში.
მანამდე, ბრიტანეთმა სამეფო არმიის 100 სამხედრო ინჟინერი გაგზავნა პოლონეთში ბელარუსის საზღვართან მიგრანტთა კრიზისთან გასამკლავებლად.
