უკრაინის საზღვართან რუსეთის ჯარების მასშტაბური კონცენტრაცის ფონზე, ნატო-ს აღმოსავლეთ ფლანგის გასაძლიერებლად, პოლონეთსა და გერმანიაში აშშ-დან სამხედრო ტექნიკა და მედესანტეები ჩავიდნენ. ამის შესახებ პოლონეთის თავდაცვის სამინისტრო აშშ-ის შეიარაღებული ძალების ევროპის სარდლობასთან ერთად იუწყება.
2 თებერვალს ამერიკის პრეზიდენტმა ჯო ბაიდენმა განაცხადა, რომ უახლოეს დღეებში აშშ აღმოსავლეთ ევროპაში 3 ათას სამხედროს გაგზავნის.
იმავე დღეს პენტაგონმა და პოლონეთის თავდაცვის მინისტრმა მარიუშ ბლაშაკმა განაცხადეს, რომ აშშ-ის 82-ე საჰაერო-სადესანტო დივიზიის 1700-მდე სამხედრო პოლონეთში გაიგზავნებოდა.
"ეს მოკაშირეების სოლიდარობის მკაფიო გზავნილია", - დაწერა მარიუშ ბლაშაკმა ტვიტერზე და ჯარისკაცების ფოტო გამოაქვეყნა.
ჯერჯერობით არ ვრცელდება ინფორმაცია, როდის ჩავლენ დანარჩენი ამერიკელი სამხედროები და სად განლაგდებიან. პოლონეთში ნატო-ს ძალების ფარგლებში და ორმხრივი შეთანხმების საფუძველზე უკვე იმყოფება 4 500 ამერიკელი სამხედრო.
აშშ-ის შეიარაღებული ძალების ევროპის სარდლობამ 4 თებერვალს განაცხადა, რომ ნატო-ს აღმოსავლეთ ფლანგის გაძლიერების მიზნით, გერმანიაში უკევ გაემგზავრნენ პირველი ამერიკელი სამხედროები.
"მე-18 საჰაერო-სადესანტო კორპუსის სამხედრო მოსამსახურეები დღეს უკვე ჩავიდნენ ვისბადენში", - ნათქვამია სარდლობის წარმომადგენლის განცხადებაში.
გერმანიაში შეიქმნება შტაბი 1700 მედესანტის დასახმარებლად, რომელთა გადასროლაც პოლონეთში მოხდება.
"პენტაგონის მიერ გაკეთებული განცხადების შემდეგ ევროპაში ჩვენი ნატოელი მოკავშირეების მხარდასაჭერად პირველი 2000 ჯარისკაცი ევროპაში ჩავიდა", - ნათქვამია განცხადებაში.
