ევროპარლამენტარები, ვიოლა ფონ კრამონი, მირიამ ლექსმანი და მარინა კალიურანდი განცხადებას ავრცელებენ, სადაც იუწყებიან, რომ თბილისში, 21-22 იანვარს დაგეგმილი ვიზიტი გააუქმეს.
როგორც განცხადებით ირკვევა, ვიზიტის გაუქმების მიზეზი, საქართველოს პარლამენტის თავმჯდომარის, შალვა პაპუაშვილის მოუცლელობა გახდა.
„როგორც ჟან მონეს დიალოგის თანაფასილიტატორები, მწუხარებას გამოვთქვამთ, რომ 21-22 იანვარს საქართველოში დაგეგმილი ვიზიტი არ შედგება, რადგან საქართველოს პარლამენტის თავმჯდომარე შალვა პაპუაშვილმა ვერ გამონახა დრო ჩართულობისთვის. ვიზიტი მიზნად ისახავდა საქართველოს პარლამენტთან ჟან მონეს დიალოგის პროცესის დაწყების შესაძლებლობების გაცნობას. ამ დიალოგის ამოცანაა პარტიათა შორის დიალოგის განვითარება, რათა უკეთესი დემოკრატიული საპარლამენტო კულტურა და ნდობა ჩამოყალიბდეს. ჟან მონეს დიალოგი გახლავთ მედიაციის გამოცდილი და მოქნილი ინსტრუმენტი, რომელსაც შეუძლია სხვადასხვა ინტერესებისა და პოზიციების გათვალისწინება. მწუხარებას გამოვთქვამთ, რომ ამ ამბიციური პროცესის დასაწყებად საჭირო პირობები ამ ეტაპზე არ არის შესრულებული.
გვჯერა, რომ საქართველოს პარლამენტი გადამწყვეტ როლს თამაშობს და ეკისრება პასუხისმგებლობა ქვეყანაში არსებული მავნე პოლიტიკური პოლარიზაციის აღმოფხვრასა და ინკლუზიური და რეფორმებზე ორიენტირებული დღის წესრიგის წინ წაწევაში. ქვეყნის წინაშე არსებული მთავარი გამოწვევებისა და მოქალაქეთა მოლოდინის გათვალისწინებით, ჩვენ კვლავაც მზად ვართ, დავეხმაროთ საქართველოს პარლამენტს ამ წამოწყებაში. კარგად ჩამოყალიბებული ინსტიტუციური თანამშრომლობის ფარგლებში, რომელიც უკვე არსებობს, ვთავაზობთ საქართველოს პარლამენტს, მოამზადოს საფუძველი ჟან მონეს პროცესის უახლოეს მომავალში დასაწყებად“, – აღნიშნულია განცხადებაში.
