რუმინეთმა რუსეთის მოთხოვნას, ქვეყნიდან ნატო-ს ძალების გაყვანის შესახებ, მიუღებელი უწოდა.
"ასეთი მოთხოვნა ყოვლად მიუღებელია და ის განხილვას არ ექვემდებარება", - ნათქვამია რუმინეთის საგარეო საქმეთა სამინისტროს განცხადებაში.
რუმინეთის განცხადებით, ქვეყანაში ნატო-ს წარმომადნგელობა "წმინდა თავდაცვითი რეაქციაა აღმოსავლეთ ევროპაში რუსეთის მზარდი აგრესიული ქმედებების ფონზე".
"[რუსეთის აგრესიული ქცევა] ძლიერდება, მიუხედავად ნატო-ს მცდელობისა, აწარმოოს კონსტრუქციული დიალოგი", - ნათქვამია განცხადებაში.
20 იანვარს, რუმინეთმა განაცხადა, რომ მზადაა, მიიღოს ნატო-ს დამატებითი კონტიგენტი. ამ დროისთვის, ნატო-ს მისიის ფარგლებში, რუმინეთში 1000 ამერიკელი სამხედრო იმყოფება.
მანამდე, რუსეთის მოთხოვნას უპასუხა ბულგარეთის პრემიერ-მინისტრმა კირილ პეტკოვმაც.
ცოტა ხნის წინ, გავრცელდა ცნობა, რომ რუსეთი უსაფრთხოების გარანტიების წინადადების ფარგლებში, რუმინეთიდან და ბულგარეთიდან ნატო-ს ძალების გაყვანას მოითხოვს.