მოსკოვში, თურქეთისა და სომხეთის ურთიერთობების ნორმალიზების მიზნით, ანკარისა და ერევნის დანიშნული სპეციალური წარმომადგენლების მოლაპარაკებების პირველი რაუნდი გაიმართა.
მხარეთა განცხადებით, შეხვედრა "პოზიტიურ და კონსტრუქციულ" რეჟიმში წარიმართა, რაც აძლიერებს კავშირების აღდგენისა და საზღვრების გახსნის შესაძლებლობას.
თურქეთისა და სომხეთის საგარეო საქმეთა სამინისტროებმა განაცხადეს, რომ ორივე მხარე მზადაა, ურთიერთობების სრული ნორმალიზებისთვის მოლაპარაკებები განაგრძონ ყოველგვარი წინაპირობის გარეშე.
მათი თქმით, სპეციალურმა წარმომადგენელებმა "გაცვალეს წინასწარი მოსაზრებები ნორმალიზაციის პროცესის შესახებ".
მოლაპარაკებების შემდეგი რაუნდის თარიღი და ადგილი მოგვიანებით გადაწყდება.
მოსკოვში გამართულ მოლაპარაკებებში, სომხურ მხარეს ეროვნული ასამბლეის თავმჯდომარე რუბენ რუბინიანი წარმოადგენდა, ხოლო თურქეთს - ყოფილი ელჩი აშშ-ში, სერდარ კილიჩი.
გასული წლის დეკემბერში, ცნობილი გახდა, რომ ურთიერთობების ნორმალიზების მიზნით, ანკარამ და ერევანმა სპეციალური წარმომადგენლები დანიშნეს.
მოსკოვში გამართლი მოლაპარაკებები, 2009 წლის სამშვიდობო შეთანხმების შემდეგ, კავშირების აღდგენის პირველი მცდელობა იყო. ეს შეთანხმება არასოდეს ყოფილა რატიფიცირებული და ურთიერთობები კვლავ დაძაბულია.
თურქეთსა და სომხეთს დიპლომატიური ურთიერთობა არ აქვთ და მათ შორის სახმელეთო საზღვარი 1993 წლიდან დაკეტილია.
2008-2009 წლებში სომხეთის პრეზიდენტის სერჟ სარგსიანის დროს ერევანმა და ანკარამ სცადეს ურთიერთობების გაუმჯობესება და საზღვრის გახსნა, მაგრამ ორი გადაუჭრელი პრობლემის - ყარაბაღისა და თურქეთის მიერ 1915 წელს სომხების გენოციდის არ აღიარების გამო - ეს მცდელობა ჩაიშალა.