ნიდერლანდების მეფე ვილემ-ალექსანდერის განცხადებით, სამეფო ოჯახი შეწყვეტს "ოქროს ეტლით" სახელით ცნობილი, ოქროთი მოვარაყებული ისტორიული სამეფო კარეტის გამოყენებას.
მონარქის ამ გადაწყვეტილებას წინ უსწრებდა მრავალწლიანი დებატები, კარეტის რასისტული გამოხატულებისა და ნიდერლანდების კოლონიალურ ეპოქასთან კავშირის თაობაზე.
თავის განცხადებაში, მეფე ვილემ-ალექსანდერმა აღიარა, რომ კარეტა შესაძლოა შეურაცხმყოფელი ყოფილიყო ადამიანების დიდი ნაწილისთვის და კიდევ ერთხელ მოუწოდა მოქალაქეებს, ერთად შეაფასონ ქვეყნის კოლონიური ისტორიის მემკვიდრეობა.
"ისტორიული ობიექტებისა და სიმბოლოების უბრალოდ აკრძალვა, რა თქმა უნდა, არ არის გამოსავალი. საჭიროა ერთობლივი ძალისხმევა, რათა წინ აღვუდგეთ დაყოფას. გვჭირდება ძალისხმევა, რომელიც გვაერთიანებს და არა გვყოფს", - თქვა მონარქმა.
კარეტის ერთ-ერთ მხარეს ამშვენებს ნიკოლას ვან დერ ვაის 1898 წლის ტრიპტიქი "კოლონიათა თაყვანისცემა" (Homage of the Colonies), რომელიც კრიტიკოსების განცხადებით, განადიდებს ქვეყნის კოლონიალურ წარსულს, რაც მიუღებელია.
ტრიპტიქზე გამოსახულია შავკანიანი და სამხრეთაზიელი ადამიანები, რომლებსაც ტახტზე მჯდომი ქალის წინ ქედი აქვთ მოდრეკილი და ძღვენს მიართმევენ.
სამეფო კარეტას ცენტრალური ადგილი ეჭირა ნიდერლანდების სამეფო ღონისძიებებში. სწორედ ამ ეტლით მიემართებოდა მონარქი პარლამენტისკენ, ჰააგის რაინდების დარბაზისკენ, სადაც პარლამენტის წინაშე სამეფო სიტყვით წარსდგებოდა.
კარეტა ამსტერდამის მოქალაქეებმა დედოფალ ვილჰელმინას 1898 წელს აჩუქეს.
ბოლო წლებია სამეფო კარეტას რესტავრაცია უტარდება და არ გამოიყენება. ვარაუდობენ, რომ ის მუზეუმში განთავსდება.