ქვეყანაში არსებული ეპიდსიტუაციიდან გამომდინარე, მნიშვნელოვნად მატულობს კოვიდინფიცირებულ პაციენტთა ნაკადი, რის გამოც ა(ა)იპ საქართველოს სამედიცინო ჰოლდინგის მართვაში არსებული კლინიკები ეტაპობრივად ახორციელებენ საწოლფონდის ზრდას ინფიცირებული კონტიგენტის მისაღებად.

იმისათვის, რომ კოვიდპაციენტებმა ადეკვატური სამედიცინო მომსახურება მიიღონ, საწოლფონდის ზრდასთან ერთად აუცილებელი გახდა შესაბამისი სამედიცინო ტექნიკისა და აპარატურის მობილიზება; სწორედ ამ მიზნით ევროპის საინვესტიციო ბანკის საქართველოს მუნიციპალური ინფრასტრუქტურის აღდგენა ცვლილების და რეპროგრამირების პროექტის (COVID-19 სპეციფიკური სქემები) ფარგლებში დევნილთა, შრომის, ჯანმრთელობისა და სოციალური დაცვის სამინისტრომ შეიძინა პაციენტებისთვის მაღალი ნაკადით ჟანგბადის მიწოდების 150 ერთეული აპარატი (ე.წ. high flow).

კლინიკების ე.წ. high flow-ს (მაღალი ნაკადით ჟანგბადის მიწოდება) აპარატით მომარაგება ძალიან მნიშვნელოვანია ინფიცირებული პაციენტების სამართავად;

შეძენილი აპარატურა ა(ა)იპ საქართველოს სამედიცინო ჰოლდინგს უკვე გადაეცა. უახლოეს დღეებში მაღალი ნაკადით ჟანგბადის მიწოდების აპარატები ჰოლდინგის მართვაში არსებულ ყველა კლინიკაში გადანაწილდება.