შეერთებული შტატები მოითხოვს, კოლექტიური უსაფრთხოების ხელშეკრულების ორგანიზაციის რუსეთის მეთაურობით მოქმედი სამხედრო ძალები დაუყოვნებლივ გავიდნენ ყაზახეთიდან. განაცხადა სახელმწიფო დეპარტამენტის პრესსპიკერმა ნედ პრაისმა.
ამავე დროს, პრაისის განცხადებით, ვაშინგტონი მიესალმება ყაზახეთის პრეზიდენტის, ყასიმ ჟომართ-თოყაევის განცხადებას კოლექტიური უსაფრთხოების ხელშეკრულების ორგანიზაციის სამხედრო მისიის დასრულების თაობაზე.
"აშშ-ის ადმინისტრაცია მოუწოდებს კოლექტიური უსაფრთხოების ხელშეკრულების ორგანიზაციის, მიჰყვნენ პრეზიდენტ თოყაევის განცხადებას და დაუყოვნებლივ დატოვონ ყაზახეთი", - თქვა პრაისმა.
"გაყვანის პროცესის დასრულებადე, ამ მისიის ყველა მონაწილემ პატივინი უნდა სცეს საერთაშორისოდ აღიარებულ ადამიანის უფლებებს", - დასძინა პრაისმა.
მანამდე, ყაზახეთის პრეზიდენტმა, ყასიმ ჟომართ-თოყაევმა, პარლამენტში გამოსვლისას, განაცხადა, რომ კოლექტიური უსაფრთხოების ხელშეკრულების ორგანიზაცია ასრულებს თავის მისიას. თოყაევმა პირობა დადო, რომ ყაზახეთიდან კონტიგენტის ეტაპობრივი გაყვანა ორ დღეში დაიწყება და 10 დღეში დასრულდება.
ყაზახეთში გათხევადებული აირის ფასის გაძვირების გამო საპროტესტო აქციები 2 იანვარს დაიწყო. პროტესტის ეპიცენტრი ქვეყნის უდიდეს ქალაქი ალმათი იყო. საპროტესტო აქციების დასრულების მიზნით, თოყაევმა გადააყენა მთავრობა ასკარ მამინის მეთაურობით და უშიშროების საბჭოს თავად ჩაუდგა სათავეში, რომელსაც უწინ ნურსულთან ნაზარბაევი ხელმძღვანელობდა.
ქვეყნის მასშტაბით საგანგებო მდგომარეობა გამოცხადდა. თოყაევმა კოლექტიური უსაფრთხოების ხელშეკრულების ორგანიზაციას დახმარების თხოვნით მიმართა, საპასუხოდ, ქვეყანაში სამხედრო კონტინგენტი გაიგზავნა.
