ჩინეთი გააგრძელებს ბირთვული არსენალის მოდერნიზებას საიმედოობისა და უსაფრთხოების უზრუნველყოფისთვის. ამის შესახებ ჩინეთის საგარეო საქმეთა სამინისტროს შეიარაღების კონტროლის დეპარტამენტის დირექტორმა, ფუ ცუნმა პეკინში გამართულ ბრიფინგზე განაცხადა.
ჩინეთის ოფიციალური პირის ეს სიტყვები მოჰყვა 5 ბირთვული სახელმწიფოს მიერ ბირთვული იარაღის დაუშვებლობის შესახებ გავრცელებულ ერთობლივ განცხადებას.
3 იანვარს გამოქვეყნებულ ერთობლივ განცხადებაში, ბირთვული სახელმწიფოები აცხადებენ, რომ პრიორიტეტად მიიჩნევენ "ბირთვული ომის თავიდან აცილებასა და სტრატეგიული რისკების შემცირებას".
ამავე დროს, 4 იანვარს გამართულ ბრიფინგზე, ფუ ცუნმა რუსეთსა და შეერთებულ შტატებს ბირთვული არსენალის შემცირებისკენ მოუწოდა.
მისი თქმით, შეერთებული შტატები და რუსეთი კვლავ ფლობენ მსოფლიოში ბირთვული ქობინების 90%-ს.
ამასთან, ფუ ცუნმა უარყო გავრცელებული მოსაზრება, რომ პეკინი მნიშვნელოვნად აფართოებს თავის ბირთვულ შესაძლებლობებს.
"ჩვენ ვინარჩუნებთ ჩვენს ბირთვულ შესაძლებლობებს მინიმალურ დონეზე, რაც ჩვენი ეროვნული უსაფრთხოებისთვის არის საჭირო. ჩინეთი გააგრძელებს ბირთვული არსენალის მოდერნიზებას საიმედოობისა და უსაფრთხოების უზრუნველყოფისთვის. ბირთვული იარაღიც ბერდება. ჩვენ უნდა დავრწმუნდეთ, რომ ჩვენი არსენალი განახლებულია და შეუძლია შემაკავებელი ფაქტორი იყოს", - თქვა ცუნმა.
2021 წლის ნოემბერში აშშ-ს თავდაცვის დეპარტამენტმა გამოაქვეყნა მოხსენება, სადაც ნავარაუდევია, რომ 2030 წლისთვის ჩინეთი შესაძლოა 1000-ზე მეტ ბირთვულ ქობინს ფლობდეს.
შეგახსენებთ, ბირთვულ იარაღს ფლობს ცხრა ქვეყანა: შეერთებული შტატები, რუსეთი, ბრიტანეთი, საფრანგეთი, ჩინეთი, ინდოეთი, პაკისტანი, ისრაელი და ჩრდილოეთ კორეა.
