პარიზში, ტრიუმფალურ თაღთან მოფრიალე ევროკავშირის უზარმაზარი დროშა, რომელიც საფრანგეთის ევროკავშირის თავმჯდომარეობასთან დაკავშირებით აღიმართა, ულტრამემარჯვენეთა აღშფოთების შემდეგ ჩამოხსნეს. იუწყება Reuters.
მანამდე, ულტრამემარჯვენე პოლიტიკოსებმა, მათ შორის პრეზიდენტობის კანდიდატებმა, მარინ ლე პენმა და ერიკ ზემურმა, მკაცრად დაგმეს ტრიუმფალურ თაღზე საფრანგეთის დროშის ევროკავშირის დროშით ჩანაცვლება.
საფრანგეთის ევროპულ საქმეთა მინისტრის კლემან ბონის განცხადებით, ევროკავშირის დროშა ისედაც დროებით იყო თაღზე დამაგრებული და მისი ჩამოხსნა ულტრამემარჯვენეთა აღშფოთებას არ უკავშირდება.
ბონმა ასევე უარყო მოსაზრება, რომ მთავრობა დათმობაზე წავიდა მას შემდეგ, რაც მარინ ლე პენმა თქვა, რომ იგი საფრანგეთის სახელმწიფო საბჭოს ევროკავშირის დროშის მოხსნის მოთხოვნით მიმართავდა.
ევროკავშირის დროშის ჩამოხსნას მიესალმა მარინ ლე პენი და განაცხადა, რომ პატრიოტებმა იძულებული გახადეს მთავრობა, უკან დაეხია.
შეგახსენებთ, ტრიუმფალურ თაღზე ევროკავშირის დროშა საფრანგეთის ევროკავშირის მორიგე თავმჯდომარეობის აღსანიშნავად აღმართეს.
პარიზმა ევროკავშირის საბჭოს თავმჯდომარეობა 6 თვით, 1-ელ იანვარს სლოვენიისგან გადაიბარა.
