აშშ-ში, კოლორადოს შტატში მძლავი ტყის ხანძრის შედეგად, ასობით სახლი დაიწვა და ათასობით ადამიანის ევაკუაცია გახდა საჭირო.
როგორც იუწყებიან, გამძვინვარებული ხანძარი, რომელიც ქარმა კიდევ უფრო გააძლიერა, ტყეებიდან ქალაქებში გავრცელდა.
ხანძრის ყველაზე მძლავრი კერა ბოულდერის ოლქში, დენვერის ჩრდილოეთით მდებარეობს. ხელისუფლება არ გამორიცხავს, რომ ხანძარს შესაძლოა მსხვერპლიც გამოეწვია.
ადგილობრივი ხელისუფლების მოთხოვნით, ქალაქ ლუისვილის, სუპერიორისა და მათი შემოგარენიდან დაახლოებით 30 000-მდე ადამიანის ევაკუაცია მოახდინეს.
სუპერიორში დაახლოებით 13 ათასი ადამიანი ცხოვრობს, ლუისვილში კი 18 ათასზე მეტი.
CBS-ის ცნობით, ხანძარმა გაანადგურა დაახლოებით 600 სახლი, ასევე სასტუმროები, სავაჭრო ცენტრები და ბიზნესი. ხანძარმა ასევე დააზიანა ელექტროგაყვანილობის ხაზები.
კოლორადოს შტატის გუბერნატორმა შტატში საგანგებო მდგომარეობა გამოაცხადა. საგანგებო რეჟიმის ამოქმედება შტატის ადმინისტრაციას შესაძლებლობას მისცემს, მოიზიდოს დამატებითი ფედერალური რესურსები და სახსრები, ასევე, საჭიროების შემთხვევაში მოითხოვოს ეროვნული გვარდიის დახმარება.
ამინდის პროგნოზის მიხედვით, უახლოეს საათებში ქარის შესუსტებაა მოსალოდნელი, რაც მეხანძრეებს ცეცხლის გავრცელების აღკვეთას გაუადვილებს.
