"თალიბანმა" ქაბულში ქალი აქტივისტების ჯგუფის დასაშლელად, რომლებიც აპროტესტებენ ქვეყანაში ქალთა მიმართ დაწესებულ შეზღუდვებს, გამაფრთხილებელი ცეცხლი გახსნა. იუწყება "ამერიკის ხმა" თვითმხილველებზე დაყრდნობით.
ქალები ყოფილ ქალთა საკითხთა სამინისტროსთან იყვნენ შეკრებილნი და სამუშაოს, საკვებ პროდუქტებსა და თავისუფლებას ითხოვდნენ. აქციის მონაწილეებს ხელთ ეპყრათ ბანერები წარწერით: "დავიღალეთ დისკრიმინაციისგან", "ჩვენ ვართ მშიერი ხალხის ხმა", "ჩვენ ქალები გამოვფხიზლდით და ვგმობთ დისკრიმინაციას", "რატომ დახურეთ სკოლები?".
აქციის ერთ-ერთმა მონაწილემ, ჰოდა ხამუშმა, "ამერიკის ხმას" უთხრა, რომ თალიბანის ძალებმა ჰაერში გაისრლოს, რათა დაეშალათ მონაწილეები, რომლებიც ცდილობდნენ შესულიყვნენ შენობაში, სადაც, დამხობილი მთავრობის დროს, განთავსებული იყო ქალთა საქმეთა სამინისტრო.
ხამუშის თქმით, ძალადობის დროს აქციის რამდენიმე მონაწილე დაშავდა, თუმცა სხვა წყაროები დაშავებულთა ან დაღუპულთა შესახებ არაფერს იუწყებიან. ვითარებას ისიც ართულებს, რომ "თალიბანის" პირობებში მედიის თავისუფლება მკვეთრად შეზღუდულია.
ავღანეთის რამდენიმე საინფორმაციო საშუალებამ გაავრცელა ფოტოები და მოკლე ვიდეომასალა საპროტესტო აქციიდან.
"თალიბანმა" ავღანეთში ძალაუფლება ხელში აგვისტოში ჩაიგდო. მას შემდეგ ქვეყანაში ქალთა უფლებები უფრო და უფრო იზღუდება, მათ უფრო მეტად უკრძალავენ სწავლასა და მუშაობას. უმეტეს სკოლებში მასწავლებლებად მუშაობის უფლება მხოლოდ კაცებს აქვთ, სწავლის კი - მხოლოდ ბიჭებს. ნოემბერში ქალებს აეკრძალათ ტელეფილმებში გადაღება. ქალ ჟურნალისტებსა და ტელეწამყვანებს მუშაობის უფლება ჯერჯერობით ისევ აქვთ, თუმცა ვალდებული არიან თავსაბურავები ატარონ.
ორი დღის წინ, ავღანეთში თალიბანის მიერ დაფუძნებულმა სათნოების ხელშეწყობისა და მანკიერების პრევენციის სამინისტრომ ქალებს თანმხლები ნათესავი მამაკაცის გარეშე აუკრძალა მოგზაურობა 72 კმ-ზე შორს.
სატრანსპორტო საშუალებების მძღოლებს ასევე ეკრძალებათ იმ ქალების წაყვანა, რომლებსაც სახე დაფარული არ ექნებათ. მძღოლებს ასევე აკრძალული აქვთ სალონში მუსიკის ჩართვა.
ფოტო: Reuters
