კორუფციისა და ორგანიზებული დანაშაულის კვლევის საერთაშორისო ცენტრმა (OCCRP) ბელარუსის მმართველი ლუკაშენკა 2021 წლის კორუფციონერად დაასახელა. ამის შესახებ ინფორმაცია ორგანიზაციის ვებგვერდზე გავრცელდა.
როგორც OCCRP-ის მიერ ინფორმაციაში ვკითხულობთ, ლუკაშენკას, "ევროპის უკანასკნელ დიქტატორს" ეს ჯილდო "ორგანიზებული დანაშაულის ხელშეწყობის და კორუფციის გამო მიენიჭა.
გავრცელებული ინფორმაციით, ლუკაშენკას კანდიდატურა წლის ყველაზე კორუმპირებულის წოდების მისანიჭებლად, 1166 კანდიდატიდან შეირჩა, რომელიც ჟურნალისტებმა, რედაქტორებმა და ცენტრის პარტნიორებმა წარადგინეს.
ჟურნალისტებისა და ანტიკორუფციული ექსპერტებისგან დაკომპლექტებულმა 6-წევრიანმა ჟიურიმ, ისტორიაში პირველად, ერთხმად დაუჭირა მხარი ლუკაშენკას კანდიდატურას.
"კორუფციის თვალსაზრისით, ეს იყო გამორჩეული წელი, მაგრამ ლუკაშენკამ ყველას აჯობა", - თქვა ჟიურის კოორდინატორმა, OCCRP-ის თანადამფუძნებელმა დრიუ სალივანმა.
ორგანიზაციამ წლის კორუფციონერად ლუკაშენკას დასახელებისას იხელმძღვანელა სხვადასხვა გარემოების გათვალისწინებით. კერძოდ, საერთაშორისო სამართლის დარღვევით, მინსკის აეროპორტში, ოპოზიციონერი ბლოგერისა და მისი მეგობარი ქალის დაკავების მიზნით, Ryanair-ის თვითმფრინავის იძულებით დაშვება, მიგრაციული კრიზისის პროვოცირება ბელარუსისა და პოლონეთის საზღვართან, კორონავირუსის შესახებ ყალბი ინფორმაციების გავრცელება, სახელმწიფო სახსრების გადაცემა ლუკაშენკას ოჯახებთან დაახლოებულ ოლიგარქებისთვის და სხვა.
"წლის კორუმპირებულის" ტიტულისთვის რბოლაში ლუკაშენკომ აჯობა ავღანეთის ყოფილ პრეზიდენტს აშრაფ ღანს, სირიის დიქტატორ ბაშარ ალ-ასადს, თურქეთის პრეზიდენტ რეჯეფ თაიფ ერდოღანს და ავსტრიის ყოფილ კანცლერს სებასტიან კურცს.
ორგანიზაცია 2012 წლიდან ასახელებს ყველაზე კორუმპირებულ პოლიტიკოსებსა და ორგანიზაციებს. გასულ წელს წლის კორუმპირებულის წოდება ბრაზილიის პრეზიდენტ ჟაირ ბოლსონარუს გადაეცა. მანამდე, წლის კორუმპირებულებად დასახელდნენ რუსეთის პრეზიდენტი პუტინი, აზერბაიჯანის პრეზიდენტი ილჰამ ალიევი, ვენესუელას მმართველი ნიკოლას მადურო და სხვა.
