ვაშინგტონი ვარაუდობს, რომ რუსეთთან უსაფრთხოების გარანტიების საკითხთან დაკავშირებით მოლაპარაკებები იანვარში დაიწყება. ამის შესახებ ჟურნალისტებს აშშ-ის სახელმწიფო მდივნის მოადგილემ ევროპისა და ევრაზიის საკითხებში კარენ დონფრიდმა განუცხადა.
"ამერიკის ხმის" ცნობით, დონფრიდმა ასევე თქვა, რომ თუ რუსეთი უკრაინას თავს დაესხმება, შეერთებული შტატები კიევს დამატებით თავდაცვით იარაღსა და მასალებს მიაწვდის.
კრემლის მიერ მოთხოვნილ უსაფრთხოების გარანტიებთან დაკავშრებით კომენტარი გააკეთა შეერთებული შტატების სახელმწიფო მდივანმა ენტონი ბლინკენმაც.
ბლინკენის განცხადებით, რუსეთის ზოგიერთი წინადადება ვაშინგტონისთვის აშკარად მიუღებელია, თუმცა სხვა საკითხებთან დაკავშირებით შესაძლებელია დიალოგის გამართვა მომავალი წლის დასაწყისისთვის.
მდივანმა ბლინკენმა ხაზგასმით აღნიშნა, რომ ასეთი მოლაპარაკებები უნდა ეხებოდეს არა მხოლოდ რუსეთის წინადადებებს, არამედ მოსკოვის ქმედებებსაც, რაც შეერთებული შტატებისა და მისი მოკავშირეების შეშფოთებას იწვევს. მან ასევე თქვა, რომ შეერთებული შტატები, ერთი მხრივ, მზადაა მსოფლიო ასპარეზზე რუსეთის შეკავებაში ჩაერთოს, მეორე მხრივ კი მოსკოვთან დიალოგი აწარმოოს.
როგორც სახელმწიფო მდივანმა აღნიშნა, შეერთებული შტატებისა და რუსეთის ფედერაციის პრეზიდენტების შეხვედრის გამართვა ჯერჯერობით არ იგეგმება. მისი თქმით, ქვეყნებმა საკამათო საკითხებზე დიპლომატიურ დონეზე უნდა იმუშაონ.
ბლინკენმა ასევე მოუწოდა მოსკოვს, რომ გადადგას ნაბიჯები დეესკალაციისკენ და უკრაინის საზღვართან თავმოყრილი ჯარები დაუბრუნოს პირვანდელ დისლოკაციის ადგილს.
ნატო-ს გენერალურმა მდივანმა, იენს სტოლტენბერგმა კი განაცხადა, რომ ალიანსი მოუთენლად მოელის მოსკოვთან მოლაპარაკებების დაწყებას მომავალი წლის დასაწყისში.
სტოლტენბერგმა, ბრიუსელში გამართულ პრესკონფერენციაზე ისიც აღნიშნა, რომ უახლოეს მომავალში ნატო-რუსეთს საბჭოს სხდომის მოწვევას გეგმავს.
ნატო-რუსეთის საბჭო 2002 წელს შეიქმნა. საბჭოს ბოლო სხდომა 2019 წლის ივლისში გაიმართა.
სტოლტენბერგმა ხაზგასმით აღნიშნა, რომ უკრაინის ნატოში გაწევრიანების საკითხი ექსკლუზიურად ნატოსა და უკრაინის პრეროგატივაა და რომ ალიანსი მოსკოვთან ნებისმიერ მოლაპარაკებაზე კონსულტაციებს კიევთან გაივლის.
დღეს, რუსეთის პრეზიდენტმა ვლადიმირ პუტინმა კიდევ ერთხელ გაიმეორა მუქარა დასავლეთის მისამართით.
რუსეთს თავდაცვის საბჭს გაფაროთებულ სხდომაზე სიტყვით გამოსვლისას, პუტინმა განაცხადა, რომ "თუ დასავლეთი გააგრძელებს აშკარად აგრესიულ ხაზს, მოსკოვი მიიღებს ადეკვატურ სამხედრო-ტექნიკურ ზომებს და მკაცრ რეაგირებას მოახდენს არამეგობრულ ნაბიჯებზე".
შეგახსენებთ, 17 დეკემბერს რუსეთის საგარეო საქმეთა სამინისტრომ გამოაქვეყნა წინადადებები უსაფრთხოების გარანტიებთან დაკავშირებით, რომლის თანახმადაც, ჩრდილოატლანტიკურმა ალიანსმა უარი უნდა თქვას აღმოსავლეთით გაფართოებასა და ყოფილი პოსტსაბჭოთა ქვეყნების მიღებაზე, ასევე უარი თქვას უკრაინასა და საქართველოსთან სამხედრო თანამშრომლობაზე.
