რუსეთის საგარეო საქმეთა მინისტრის სერგეი ლავროვის განცხადებით, დასავლეთი საქართველოს ნატო-ში "ძალით შეყვანას" ცდილობს.
როგორც რუსული სააგენტო "ტას"-ი იტყობინება, ლავროვმა პრესკონფერენციაზე თქვა, რომ რუსეთი საქართველოს ნატოში "ძალით შეყვანის" მცდელობებს წითელი ხაზის გადაკვეთად აღიქვამს.
პრესკონფერენციაზე ჟურნალისტებმა ლავროვს ჰკითხეს, ოკუპირებული ცხინვალისა და აფხაზეთს დე ფაქტო საგარეო საქმეთა მინისტრებთან შეხვედრისას, განიხილეს თუ არა ერთობლივი საპასუხო ზომები საქართველოს ნატო-ში გაწევრიანებასთან დაკავშირებით.
"არ განგვიხილავს ჰიპოთეტური სცენარები მისი [საქართველოს] მოსახლეობის დიდი ნაწილის ნების საწინააღმდეგოდ, ჩრდილოატლანტიკურ ალიანსში საქართველოს ძალით შეყვანასთან დაკავშირებით", - უპასუხა ლავროვმა დასმულ შეკითხვას.
"ჩვენი პოზიცია ნატოს გაფართოებასთან დაკავშირებით ცნობილია: ეს იქნება წითელი ხაზის გადაკვეთა, თუ ალიანსი გააგრძელებს რუსეთის ფედერაციის საზღვრებთან უფრო და უფრო მიახლოებას", - დასძინა მან.
17 დეკემბერს რუსეთის საგარეო საქმეთა სამინისტრომ გამოაქვეყნა წინადადებები უსაფრთხოების გარანტიებთან დაკავშირებით, რომლის თანახმადაც, ჩრდილოატლანტიკურმა ალიანსმა უარი უნდა თქვას აღმოსავლეთით გაფართოებასა და ყოფილი პოსტსაბჭოთა ქვეყნების მიღებაზე, ასევე უარი თქვას უკრაინასა და საქართველოსთან სამხედრო თანამშრომლობაზე.
