ახალი სანქციები რუსეთის ფედერაციის წინააღმდეგ უკრაინის ირგვლივ არსებულ ვითარებასთან დაკავშირებით, მიმართული უნდა იყოს რუსეთის ფედერაციის უშუალო ლიდერებისკენ, - განაცხადა გერმანიის ფედერაციული რესპუბლიკის თავდაცვის მინისტრმა კრისტინა ლამბრეხტმა.
გერმანიის სოციალ-დემოკრატი თავდაცვის მინისტრი გულისხმობს სანქციათა იმ პაკეტს, რომელზეც ევროკავშირი შეთანხმდა და რომლის ამოქმედებაც იგეგმება რუსეთის წინააღმდეგ, თუ ის უკრაინაში შეიჭრება.
Bild-თან ინტერვიუში მან თქვა, რომ დასავლეთმა უნდა გამოიყენოს ინსტრუმენტების მთელი სპექტრი, რაც კი ხელთ უპყრია.
ლამბრეხტის თქმით, სანქციების სამიზნე პუტინი და მისი უშუალო გარემოცვის წევრები უნდა იყვნენ.
"აგრესიაზე პასუხისმგებელებმა პირადად უნდა იგრძნონ შედეგები", - თქვა მან და დასძინა "მაგალითად, დაკარგონ პარიზში, ელისეის მინდვრებზე საყიდლებზე სეირნობის შესაძლებლობა".
ლამბრეხტმა ასევე შეშფოთება გამოხატა უკრაინის საზღვრებთან რუსეთის ფედერაციის სამხედრო წარმომადგენლობის გაძლიერების გამო.
"აშკარაა, რომ აგრესორი რუსეთია. ჩვენ უნდა გამოვიყენოთ ყველა შესაძლებლობა, რათა შევაჩეროთ სიტუაციის ესკალაცია. ეს მოიცავს მკაცრი სანქციების შემოღებას", - ხაზგასმით აღნიშნა მინისტრმა.
ჟურნალისტის მიერ დასმულ შეკითხვასთან დაკავშირებით, უკრაინაში ბუნდესვერის (გერმანიის თავდაცვის ძალები) ჯარისკაცების შესაძლო გაგზავნის თაობაზე, კრისტინა ლამბრეხტმა თქვა, რომ "აუცილებელია, ჯერ დიპლომატიისა და ეკონომიკური სანქციების ყველა შესაძლებლობა იქნეს გამოყენებული".
