ბელარუსის სასამართლომ, რომლის სხდომაც დახურულ კარს მიღმა ჩატარდა, რეჟიმის ყველაზე მწვავე კრიტიკოსს, სიარჰეი ციხანოუსკის 18-წლიანი პატიმრობა მიუსაჯა.
აქტივისტის მეუღლემ, სვიატლანა ციხანოუსკაიამ დაგმო ბელარუსის სასამართლოს გადაწყვეტილება.
"ეს არის დიქტატორის საჯარო შურისიძება თავის ყველაძე ძლიერ ოპონენტებზე. პოლიტპატიმრების საქმეების დახურულ სასამართლო პროცესებზე განხილვისას, ის იმედოვნებს, რომ რეპრესიებს მალულად გააგრძელებს, მაგრამ მას მთელი მსოფლიო ადევნებს თვალს. ჩვენ არ გავჩერდებით", - თქვა მან.
43 წლის სიარჰეი ციხანოუსკი, რომელიც პატიმრობაში 2020 წლის მაისიდან იმყოფება, დამნაშავედ ცნეს მასობრივი არეულობის ორგანიზებასა და სოციალური სიძულვილის წაქეზებაში.
შარშან გამართულ საპრეზიდენტო არჩევნებზე სიარჰეი ციხანოუსკი საპრეზიდენტო კანდიდატი უნდა ყოფილიყო, მაგრამ ცენტრალურმა საარჩევნო ადმინისტრაციამ არ დაარეგისტრირა.
მალევე, აქტივისტი დააკავეს და ბრალი წაუყენეს საზოგადოებრივი წესრიგის დარღვევისთვის.
ამის შემდეგ, ოპოზიციურ მოძრაობას სათავეში სიარჰეი ციხანოუსკის ცოლი, სვიატლანა ციხანოუსკაია ჩაუდგა და არჩევნებში მონაწილეობა მიიღო.
არჩევნების შედეგების გამოცხადებიდან მალევე, სვიატლანა ციხანოუსკაიამ ორ მცირეწლოვან შვილთან ერთად ბელარუსი დატოვა და ლიეტუვაში გადავიდა.
ფოტო: AFP
