შეერთებული შტატების ვიცე-პრეზიდენტის კამალა ჰარისის ვიეტნამში ვიზიტი რამდენიმე საათით გადაიდო "ჰავანის სინდრომის" მსგავსი იდუმალი დაავადების შესაძლო შემთხვევის გამო. იტყობინება BBC.
ვიეტნამში ვიზიტამდე, კამალა ჰარისი სინგაპურში იმყოფებოდა, რა დროსაც გავრცელდა ინფორმაცია ვიეტნამის დედაქალაქ ჰანოიში "ჰავანის სინდრომის" შემთხვევის შესახებ.
ამ დროისთვის, უცნობია ვის აღმოაჩნდა დაავადების სიმპტომები.
CBS News-ი იტყობინება, რომ ვიეტნამის დედაქალაქში გამოვლენილი "ჰავანის სინდრომისთვის" დამახასიათებელი სიმპტომები წინა სხვა შემთხვევების მსგავსია.
შეერთებული შტატების სახელმწიფო დეპარტამენტის მიერ გავრცელებულ განცხადებაში ნათქვამია, რომ ვიცე-პრეზიდენტის სინგაპურიდან ჰანოიში გამგზავრება მას შემდეგ გადაიდო, რაც გავრცელდა ინფორმაცია "ჰავანის სინდრომის" შესაძლო გამოვლენის შესახებ.
დეპარტამენტის განცხადებაში აღნიშნულია, რომ ვითარების საგულდაგულოდ შეფასების შემდეგ, ვიცე-პრეზიდენტმა ჰარისმა და მისმა დელეგაციამ გადაწყვიტეს ჰანოიში გამგზავრება. ახლა, ისინი უკვე ჰანოიში იმყოფებიან.
CBS News-სთან საუბრისას ერთ-ერთმა ოფიციალურმა პირმა, ანონიმურობის დაცვის პირობით, განაცხადა, რომ "ჰავანის სინდრომისთვის" დამახასიათებელი სიმპტომების გამო, ერთ-ერთი ოფიციალური პირის სამედიცინო ევაკუაცია გახდა საჭირო. მისივე თქმით, ეს არ არის ვიეტნამში "ჰავანის სინდრომის" გამოვლენის პირველი შემთხვევა.
NBC New-ის ინფორმაციით, კი ორი ამერიკელი დიპლომატის ევაკუაცია გახდა საჭირო, მას შემდეგ, რაც მათ სახლებში ადგილი ჰქონდა "აკუსტიკურ" ინციდენტებს.
შეგახსენებთ, გასულ კვირას Wall Street Journal-მა გაავრცელა ინფორმაცია გერმანიაში ამერიკელ დიპლომატებს შორის "ჰავანის სინდრომის" მსგავსი იდუმალ დაავადების სიმპტომების გამოვლენის შესახებ.
ივლისში, გერმანული გამოცემა Der Spiegel-ი იუწყებოდა, რომ აშშ ავსტრიის დედაქალაქ ვენაში იძიებდა "ჰავანის სინდრომის" მსგავს იდუმალ დაავადებას, რომელიც ამერიკელ დიპლომატებს შორის გამოვლინდა.
მაშინ იუწყებოდნენ, რომ "ჰავანის სინდრომის" მსგავსი დაავადების სიმპტომი 20-მდე ადამიანს გამოუვლინდა. მოგვიანებით, გამოცემა Politico წერდა, რომ აშშ იკვლევდა რუსული სპეცსამსახურების შესაძლო კავშირს "ენერგეტიკულ შეტევასთან".
"ჰავანის სინდრომი" უწოდეს დაავადებას, რომელიც თავბრუსხვევით, გულისრევით, თავის ტკივილებითა და მეხსიერების პრობლემებით მიმდინარეობს.
პირველად ამ სახელწოდების დაავადება 2016 წელს გაჩნდა, როდესაც კუბის დედაქალაქ ჰავანაში მყოფმა ამერიკის საელჩოს თანამშრომლებმა სიმპტომების ქონის შესახებ განაცხადეს.
დაავადების გამომწვევი მიზეზები ამ დრომდე უცნობია. სავარაუდოდ, სიმპტომებს იწვევს მძლავრი რადიოსიხშირე ან ენერგეტიკული შეტევა. ზოგიერთ შემთხვევაში, მსგავსმა შეტევებმა ტვინის დაზიანებაც გამოიწვია.
