რუსეთის პრეზიდენტის ვლადიმირ პუტინის განცხადებით, რუსეთის საზღვაო ფლოტს მალე ოთხი წყალქვეშა ნავი შეემატება. ამის შესახებ პუტინმა ფორუმ "არმიის" გახსნისას განაცხადა.

პუტინის თქმით, რუსეთის გემთმშენებელ ქარხანაში წყალქვეშა ნავების გამალებული მშენებლობა მიმდინარეობს.

მისივე თქმით, მათ შორის ორი წყალქვეშა ნავი ბირთვული სარაკეტო გადამზიდავებით იქნება აღჭურვილი.

ამასთან, პუტინმა აღნიშნა, რომ მიმდინარეობს მუშაობა ახალი იარაღის, მათ შორის საჰაერო-სარაკეტო სისტემისა და უპილოტო საფრენი აპარატის "ოხოტნიკის" შექმნაზე.

"ამ იარაღებს მათი ტაქტიკური და ტექნიკური მახასიათებლების თვალსაზრისით მსოფლიოში ანალოგი არ მოეძებნება და ზოგიერთ მათგანთან დაკავშირებით, დაბეჯითებით შეიძლება ითქვას, რომ მათ ანალოგი კიდევ დიდი ხნის განმავლობაში არ იარსებებს", - თქვა პუტინმა.

გამოცემა National Interest-ის 2019 წლის მონაცემებით, რუსეთის ფლოტი ძლიერებით მსოფლიოში მესამეა, შეერთებული შტატებისა და ჩინეთის შემდეგ. რუსეთის ფლოტმა შეიარაღებისა და ხომალდების უდიდესი ნაწილი საბჭოთა კავშირისგან მემკვიდრეობით მიიღო.

რუსეთის საზღვაო ფლოტის შემადგენლობაში შედის 1 ავიამზიდი "ადმირალი კუზნეცოვი", ასევე 78 ხომალდი, 5 კრეისერი, 13 გამანადგურებელი და 52 წყალქვეშა ნავი.