"სტრატეგია აღმაშენებლის" ლიდერი გიორგი ვაშაძე კორონავირუსის გავრცელების აღსაკვეთად დაწესებული რეგულაციების გამკაცრებას მოითხოვს.
ვაშაძის განცხადებით, ქვეყანაში უმძიმესი ეპიდემიოლოგიური ვითარებაა, რასაც სისტემური და კომპლექსური მართვა სჭირდება.
"ქვეყანაში კოვიდთან დაკავშირებით უმძიმესი ვითარებაა. დღეს კიდევ 60 ადამიანი გარდაიცვალა და ვუთანაგრძნობ ყველა გარდაცვლილის ოჯახს, ძალიან კარგად მესმის, რამხელა ტკივილია, რადგან მე მამა დავკარგე კოვიდდაავადებისგან. ქვეყანაში უმძიმესი ვითარებაა. სამწუხაროდ, ის, რაც ხდება, ვერც ერთ შემთხვევაში ვერ შეფასდება, რომ რამის მართვა ან ორგანიზებაა მიმდინარეობს. სამწუხაროდ, გვაქვს ქაოსი და ასეთ მძიმე ვითარებას სჭირდება სისტემური და კომპლექსური მართვა, დიახ, ანტიკრიზისული მართვა, რომელიც რაც შეიძლება სწრაფად გამოგვიყვანს მდგომარეობიდან და რომელიც მოგვცემს შესაძლებლობას, გადავარჩინოთ ადამიანთა სიცოცხლეები", - ამბობს ვაშაძე.
ეპიდემიოლოგიური ვითარების გათვალისწინებით, გიორგი ვაშაძე გამოდის მოწოდებით, სულ მცირე ორი კვირის განმავლობაში გამკაცრდეს დაწესებული რეგულაციები. ამასთან, პოლიტიკოსის განცხადებით, მაქსიმალურად უნდა გაიზარდოს ტესტირებულთა და ვაქცინირებულთა რაოდენობა.
"სამწუხაროდ, გამოსავალი არის ერთადერთი, ჩვენ ვფიქრობთ, რომ მინიმუმ ორი კვირის მანძილზე უნდა გამკაცრდეს რეგულაციები, რომ შეწყდეს ქვეყანაში გადაცემის ჯაჭვი და ამასთან ერთად, ძალიან მნიშვნელოვანია, გაფართოვდეს ვაქცინაციის შესაძლებლობა და ხელმისაწვდომობა, გაფართოვდეს ტესტირების შესაძლებლობა, უფასო ტესტირება უნდა იყოს შესაძლებელი ყველა მოქალაქისთვის, რათა დროულად მოხდეს ინფიცირებულთა გამოვლენა", - დასძენს ვაშაძე.
