ავღანეთში დარჩენილი საქართველოს 16 მოქალაქე სამშობლოში დღეს გამოფრინდება.
საქართველოს საგარეო საქმეთა მინიტრის მოადგილის ალექსანდრე ხვთისიაშვილის განცხადებით, საქართველოს 16 მოქალაქე ქაბულიდან დუბაიში, შემდეგ კი საქართველოში ჩამოფრინდება.
მისივე თქმით, საქართველოს მოქალაქეები ამ დროისთვის ნატო-ს ბაზაზე უსაფრთხოდ იმყოფებიან.
"16 ქართველი იყო დარჩენილი დღევანდელ დღემდე ქაბულში. დღეს, დილით მოხდა მათი უსაფრთხო გადაყვანა მათი ლოკაციის ადგილიდან აეროპორტში, ნატო-ს ბაზაზე. შესაბამისად, ახლა მიდის პროცესი, ისინი სხდებიან თვითმფრინავში. ბრიტანელების მიერ არის უზრუნველყოფილი რეისი დუბაის მიმართულებით. სავარაუდოდ დღეს, დღის განმავლობაში ჩამოფრინდებიან საქართველოში", - განაცხადა ალექსანდრე ხვთისიაშვილმა.
გუშინ, ავღანეთიდან საქართველოს ორი მოქალაქე დაბრუნდა.
მანამდე, 18 აგვისტოს, საქართველოს ექვსმა მოქალაქემ, უნგრული ბორტით, ავღანეთი დატოვა და სამშობლოში დაბრუნდა.
