ამერიკული გამოცემა Wall Street Journal-ი ავრცელებს ინფორმაციას, გერმანიაში ამერიკელ დიპლომატებს შორის "ჰავანის სინდრომის" მსგავსი იდუმალ დაავადების სიმპტომების გამოვლენის შესახებ.
გავრცელებული ინფორმაციით, გერმანიაში სამედიცინო დახმარებას სულ მცირე ორმა ამერიკელმა დიპლომატმა მიმართა, რომლებიც უჩიოდნენ შემდეგ სიმპტომებს: გულისრევა, ძლიერი თავის ტკივილი, ყურის ტკივილი, დაღლილობა, უძილობა.
Wall Street Journal-ის ინფორმაციით, ეს არის "ჰავანის სინდრომის" მსგავსი იდუმალი დაავადების სიმპტომების გამოვლენის პირველი შემთხვევა ქვეყანაში, რომელიც ნატოს წევრია და სადაც განლაგებულია ამერიკული ჯარები და ბირთვული იარაღი.
გამოცემის წყაროს ინფორმაციით, მსგავსი სიმპტომები გამოუვლინდათ ამერიკელ დიპლომატებს ევროპის სხვა ქვეყნებშიც, თუმცა წყაროს მეტი დეტალი არ გაუმჟღავნებია.
როგორც იუწყებიან, ზოგიერთი დიპლომატი, რომელსაც დაავადების სიმპტომი გამოუვლინდა, დაკავებულია რუსეთთან დაკავშირებული საკითხებით, კერძოდ, გაზის ექსპორტი, კიბერუსაფრთხოება და პოლიტიკური ჩარევა.
ერთ-ერთი დიპლომატი ამჟამად შეერთებულ შტატებში, მერილენდის ეროვნულ სამხედრო ჰოსპიტალში გადის მკურნალობას. Wall Street Journal-თან ინტერვიუში საელჩოს ოფიციალურმა წარმომადგენელმა განაცხადა, რომ ექიმებმა მას დაუსვეს თავისი ტვინის დაზიანების დიაგნოზი. ტვინის დაზიანება დაახლოებით წააგავდა იმგვარ დაზიანებას, რომელიც ადამიანმა ძლიერი აფეთქების შედეგად გამოწვეული ჰაერის ტალღის დარტმისას შეიძლება მიიღოს.
დიპლომატმა ჯერ კიდევ მარტში იგრნო ძლიერი ტკივილი, ხმაური და წნევა ყურებში. ის სახლში იმყოფებოდა ბერლინში. გარკვეული პერიოდის შემდეგ, საელჩომ იგი ვაშინგტონში დააბრუნა.
ამ სიმპტომების გამომწვევი მიზეზების გამოსაძიებლად, აშშ-ის ცენტრალურ სადაზვერვო სააგენტოში (CIA) სამუშაო ჯგუფი შეიქმნა.
შეგახსენებთ, ივლისში, გერმანული გამოცემა Der Spiegel-ი იუწყებოდა, რომ აშშ ავსტრიის დედაქალაქ ვენაში იძიებდა "ჰავანის სინდრომის" მსგავს იდუმალ დაავადებას, რომელიც ამერიკელ დიპლომატებს შორის გამოვლინდა.
მაშინ იუწყებოდნენ, რომ "ჰავანის სინდრომის" მსგავსი დაავადების სიმპტომი 20-მდე ადამიანს გამოუვლინდა. მოგვიანებით, გამოცემა Politico იუწყებოდა, რომ აშშ იკვლევდა რუსული სპეცსამსახურების შესაძლო კავშირს "ენერგეტიკულ შეტევასთან".
"ჰავანის სინდრომი" უწოდეს დაავადებას, რომელიც თავბრუსხვევით, გულისრევით, თავის ტკივილებითა და მეხსიერების პრობლემებით მიმდინარეობს.
პირველად ამ სახელწოდების დაავადება 2016 წელს გაჩნდა, როდესაც კუბის დედაქალაქ ჰავანაში მყოფმა ამერიკის საელჩოს თანამშრომლებმა სიმპტომების ქონის შესახებ განაცხადეს.
დაავადების გამომწვევი მიზეზები ამ დრომდე უცნობია. სავარაუდოდ, სიმპტომებს იწვევს მძლავრი რადიოსიხშირე ან ენერგეტიკული შეტევა. ზოგიერთ შემთხვევაში, მსგავსმა შეტევებმა ტვინის დაზიანებაც გამოიწვია.
