ალერგოლოგ-იმუნოლოგი ბიძინა კულუმბეგოვი საპატრიარქოს სთხოვს აღკვეთოს მისი და მისი კოლეგების წინააღმდეგ მიმართული კამპანია, რომელსაც ზოგიერთი სასულიერო პირი აწარმოებს.
"სასულიერო პირების ერთმა ჯგუფმა დღეს ჩემი და ჩემი კოლეგების საქმიანობა შეადარა ნაცისტი ექიმის, იოზეფ მენგელის ჩადენილ ქმედებებს.
როგორც ბევრჯერ მოგვისმენია, თქვენ არ ერევით ექიმების საქმეში, ამიტომ საპატრიარქოს ვთხოვ აღკვეთოს ჩვენს წინააღმდეგ მიმართული კამპანია, რომელიც უხეში ჩარევაა ჩვენს საექიმო და საგანმანათლებლო საქმიანობაში და ამ პროცესში ხელისშეშლა პირდაპირ ითარგმნება ადამიანების სიკვდილში!" - აცხადებს ბიძინა კულუმბეგოვი.
ბიძინა კულუმბეგოვი, გაეროს ბავშვთა ფონდსა და დაავადებათა კონტროლის ცენტრთან ერთად, აქტიურად არის ჩართული კორონავირუსის საწინააღმდეგო ვაქცინაციის ცნობიერების ამაღლების პროცესში.
კულუმბეგოვი დღეს სამეგრელო-ზემო სვანეთის რეგიონში, ზუგდიდსა და მესტიაში იმყოფებოდა, სადაც საინფორმაციო შეხვედრის შემდეგ, პედაგოგთა 100% აიცრა.
შეგახსენებთ, დეკანოზმა დავით ისაკაძემ ექიმებს "ფაშისტები" უწოდა და ისინი შეადარა ნაცისტ ექიმ იოზეფ მენგელს, რომელიც "უფლებააყრილ ადამიანებზე მათი ნების საწინააღმდეგოდ ახორციელებდა ექსპერიმენტებს აცრის სახით".
