სახელგანთქმული ამერიკელი მომღერალი და ნობელის პრემიის ლაურეატი (ლიტერატურის დარგში) ბობ დილანი არასრულწლოვნის მიმართ სექსუალურ ძალადობაში დაადანაშულეს.
მუსიკოსის წინააღმდეგ სარჩელი ნიუ იორკის შტატის სასამართლოში 14 აგვისტოს შევიდა. მოსარჩელე, რომლის ვინაობაც არ სახელდება, კონექტიკუტის შტატის მკვიდრია. ის ბობ დილანს გაუპატიურებაში ადანაშაულებს.
მოსარჩელის განცხადებით, 1965 წელს, როცა ის 12 წლის იყო, მომღერალმა თავის აპარტამენტებში გააუპატიურა.
სარჩელში აღნიშნულია, რომ 23 წლის ბობ დილანმა გამოიყენა თავისი პოპულარობა ნდობის მოსაპოვებლად, გოგონას ალკოჰოლი და ნარკოტიკები მიაღებინა შემდეგ კი სექსუალურად იძალადა.
სავარაუდო გაუპატიურება მოხდა მანჰეტენზე, სასტუმრო ჩელსიში, სადაც ერთ დროს დილანი ცხოვრობდა.
მოსარჩელე ბობ დილანს ადანაშაულებს სხეულის დაზიანებასა და ფსიქიკურ ტანჯვაში. ის ამტკიცებს, რომ დღემდე განიცდის ემოციური ტრავმის შედეგებს. სავარაუდო მსხვერპლი ითხოვს ფინანსურ კომპენსაციას, რომლის ოდენობაც არ არის მითითებული.
ბობ დილანი კატეგორიულად უარყოფს მის მიმართ გაჟღერებულ ბრალდებებს.
"ეს ბრალდებები ყალბია და არტისტი ყველაფერს იღონებს საკუთარი თავის დასაცავად", - განაცხადა 16 აგვისტოს 80 წლის მუსიკოსის პრესსპიკერმა.
