16 აგვისტოს დილით შეხვედრისა და მოგვიანებით, დახურულ კარს მიღმა კონსულტაციების შემდეგ, გაეროს უშიშროების საბჭომ ავღანეთთან დაკავშირებით ერთობლივი განცხადება გამოაქვეყნა.
განცხადებაში, უშიშროების საბჭოს წევრები საომარი მოქმედების შეწყვეტას და ახალი მთავრობის შექმნის მოწოდებით გამოდიან.
"გაეროს უშიშროების საბჭოს წევრები გამოდიან მოწოდებით, დაუყოვნებლივ შეწყდეს ყოველგვარი საომარი მოქმედება ავღანეთში და ინკლუზიური მოლაპარაკებების გზით, დაიწყონ მუშაობა ახალი ინკლუზიური და წარმომადგენლობით მთავრობის შექმნაზე, მათ შორის ქალთა სრული, თანაბარი და მნიშვნელოვანი მონაწილეობით.
ხაზგასმით აღვნიშნავთ, რომ უზრუნველყოფილი უნდა იყოს ინსტიტუციური უწყვეტობა და ავღანეთის მიერ საერთაშორისო ვალდებულებების დაცვა, ისევე როგორც ავღანელი და საერთაშორისო მოქალაქეების უსაფრთხოება", - აღნიშნულია განცხადებაში.
უშიშროების საბჭომ ასევე "გამოხატა ღრმა შეშფოთება" საერთაშორისო ჰუმანიტარული სამართლისა და ადამიანის უფლებების დარღვევის გამო და "ხაზი გაუსვა დამნაშავეთა პასუხისგებაში მიცემის სასწრაფო და გადაუდებელ აუცილებლობას".
გარდა ამისა, საბჭომ გამოვიდა მოწოდებით, გაძლიერდეს საერთაშორისო ძალისხმევა ავღანეთის ჰუმანიტარული დახმარების გაწევისთვის.
"უშიშროების საბჭოს წევრებმა დაადასტურეს ავღანეთში ტერორიზმთან ბრძოლის მნიშვნელობა იმის უზრუნველსაყოფად, რომ ავღანეთის ტერიტორია არ იქნას გამოყენებული სხვა ქვეყნის მუქარის ან თავდასხმისთვის და რომ არც თალიბანმა და არც სხვა ავღანურმა ჯგუფმა ან პიროვნებამ არ უნდა დაუჭიროს მხარი ტერორისტებს", - ნათქვამია უშიშროების საბჭოს განცხადებაში.
