რუსეთმა თავის ტერიტორიაზე შესვლა 50 წლით აუკრძალა აზერბაიჯანელ დიპლომატს, აზერბაიჯანის ყოფილ ელჩს ბელარუსში, მოლდოვასა და პაკისტანში ისფანდიარ ვაჰაბზადეს, რომელმაც, მოსკოვის ცნობით, „ეთნიკური შუღლის გამომწვევი“ განცხადებები გააკეთა.
რუსეთს შინაგან საქმეთა სამინისტროს განცხადებით, ისფანდიარ ვაჰაბზადეს რუსეთში ყოფნამ „შეიძლება საფრთხე შეუქმნას საზოგადოებრივ წესრიგსა და უსაფრთხოებას“.
როგორც იუწყებიან, აზერბაიჯანელმა დიპლომატმა ერთ-ერთ სატელევიზიო ეთერში, შეურაცხმყოფელად მოისხენია რუსეთის ლიბერალ-დემოკრატიული პარტიის ლიდერი ვლადიმირ ჟირინოვსკი და მასთან ერთად რუსები.
დიპლომატმა ჟირინოვსკის „მსუქანი ღორი“ და „ბებერი ვირი“ უწოდა.
გარდა ამისა, ისფანდიარ ვაჰაბზადემ აღნიშნა, რომ მან "იცის რას აკეთებენ რუსი ღორები". ”ისინი სისულელეებს აკეთებენ, ყარან. თქვენი სუნი უკვე ვრცელდება მთელ მსოფლიოში. სუნთქვა შეუძლებელია".
დიპლომატის განცხადებას აღშფოთება მოყვა რუსეთის მმართველ პოლიტიკურ წრეებსა და საზოგადოებაში. რუსეთის დუმის სპიკერის მოადგილემ, პეტრე ტოლსტოიმ ვაჰაბზადეს ბოდიშის დაუყოვნებლივ მოხდისკენ მოუწოდა.
აზერბაიჯანელი დიპლომატის გაცხარება მოჰყვა ჟირინოვსკის მორიგ პროვოკაციულ განცხადებას, როდესაც მან თქვა, რომ რუსეთმა უნდა აღადგინოს თავისი იმპერია საბჭოთა კავშირის ტერიტორიის ფარგლებში და სამხრეთ კავკასიას მოსკოვის გავლენის ზონა უწოდა.
მომხდართან დაკავშირებით კომენტარის გაკეთებაზე უარი თქვა აზერბაიჯანის საგარეო საქმეთა სამინისტრომ და მიანიშნა, რომ დიპლომატი ჯერ კიდევ 2016 წელს გაათავისუფლეს „საქმიანობაში აღმოჩენილი ხარვეზების გამო“.
ისფანდიარ ვაჰაბზადე მანამდეც გამოირჩეოდა რუსეთის მიმართ მკაცრი განცხადებებით. 2019 წელს მან რუსებს „ჰიბრიდული ერი“ უწოდა, რომლებიც „სავარაუდოდ მონღოლებისა და ებრაელების შთამომავლები არიან“.
