ქობულეთის ტურისტულ ზონაში მონაწილე კომპანიებისთვის განაცხადის შეტანის ვადა სამთავრობო კომისიამ 15 დეკემბრამდე გაახანგრძლივა.
როგორც დღეს, კომისიის სხდომის დასრულების შემდეგ, ეკონომიკისა და მდგრადი განვითარების მინისტრმა ვერა ქობალიამ განაცხადა, პროექტში მონაწილეობის სურვილი დიდი იყო. ამიტომ კომისიამ მიიღო გადაწყვეტილება და განაცხადების შეტანის ვადა 15 დეკემბრამდე გაახანგრძლივა.
"ჩვენ გინდოდა უფრო მეტი კომპანიებისთვის მიგვეცა საშუალება, რომ ტურისტულ ზონაში სასტუმროები ააშენონ. სწორედ ამიტომ მივიღეთ გადაწვეტილება და განაცხადების წარდგენის ვადა 15 დეკემბრამდე იქნება. მას შემდეგ, რაც ოფიციალურად განაცხადების წარდგენის ვადა ამოიწურა, ახალი განაცხადები ისევ შემოდიოდა. სწორედ ამიტომ იქნა მიღებული აღნიშნული გადაწყვეტილება," - განაცხადა ვერა ქობალიამ.
მინისტრის თქმით, იმ კომპანიებს, რომლებსაც დღემდე ჰქონდათ შემოტანილი განაცხადი, პროექტში მონაწილეობას ჩვეულებრივად აგრძელებენ.
როგორც მინისტრმა განმარტა, 15 დეკემბრამდე შემოტანილი კომპანიების პროექტების განხილვისა და დამტკიცების შემდეგ, გადაიწევს თუ არა ამ ინვესტორებისათვის სასტუმროების აშენების ვადა 1 აგვისტოს შემდეგ, ეს მომავალი სამთავრობო კომისიის სხდომაზე გახდება ცნობილი.
შეგახსენებთ, რომ ქობულეთში "თავისუფალი ტურისტული ზონის" განვითარების მიზნით, ე.წ "ფიჭვნარის" ტერიტორიზე, ზღვიდან 140 მ-ის დაშორებით, ახალი სასტუმროების მშენებლობისთვის მთავრობამ პოტენციურ ინვესტორებს განსხვავებული შეღავათები შესთავაზა.
პროექტის თანახმად, ე.წ "ფიჭვნარის" ტერიტორიზე, გამოყოფილია მიწის 3 ნაკვეთი (საერთო ფართით 11,3 ჰა), რომლებზედაც დაგეგმილია 30 სასტუმრო კორპუსის მშენებლობა. განსაზღვრულია სასტუმრო კორპუსების 3 ტიპი. მშენებლობის მსურველს შეუძლია არჩევანი გააკეთოს.
ასევე, განსაზღვრულია, სასტუმრო კორპუსების სართულიანობაც: 5, 6 ან 7 სართული (42, 52 ან 60 ნომერი).
პროექტის თანახმად, სამშენებლო მიწის ნაკვეთის განკარგვა განხორციელდება სიმბოლურ ფასად, დამტკიცებული საპროექტო-სამშენებლო დოკუმენტაცია დამკვეთს გადაეცემა უსასყიდლოდ. ტერიტორია უზრუნველყოფილი იქნება საინჟინრო-კომუნალური ქსელებით და სათანადო ინფრასტრუქტურით.